KUCHING, 18 Mei: Bisi 856 buah kerita enggau motosikal deka nyereta konvoi kembara beserimbai enggau Pengerami 60 Taun Sarawak Merdeka.

Menteri Nembiak, Lumba enggau Pemansang Dagang Sarawak, Dato Sri Abdul Karim Rahman Hamzah Madah, pengawa ngelancharka konvoi nya deka dipenyadika Premier Sarawak Datuk Patinggi Tan Sri Abang Johari Tun Openg kena 28 Mei tu.

Tandu Abdul Karim konvoi kembara nya deka neresa selampur bagi menua di Sarawak berengkah ari Lawas nyentuk ke Kuching.

“Tuju kembara tu iya nya nerenak semangat patriotisme enggau mega penyayau ngagai menua diri lebih agi ba rayat pupu bansa, ba serap bagi menua di Sarawak.

“Kelimpah ari nya mega konvoi tu deka ngerandau rayat seraya belematika pengerami 60 taun Sarawak Merdeka seraya nyadung enggau ngitau menira Sarawak ba semua palan penyangkai ke udah ditetapka tuan Residen diri empu,” ku iya.

Abdul Karim madah munyi nya ba Aum Media Konvoi Kembara Sarawak Merdeka di Wisma Bapa Malaysia, ditu kemari.

Ku iya mega, konvoi ke mansa 12 bagi menua nya diatur pengelama 56 hari nujah pejalai penyauh 3,516 kilometer.

Konvoi tetap ungkup kembara nya dipasuk 37 pengari, 14 entukar enggau 4 buah motosikal ari Tim Komiti Opis Menteri Nembiak, Lumba enggau Pemansang Dagang Sarawak (MYSED) sereta Unit Komunikasyen Perintah Sarawak (UKAS), Kerita Trafik Pematau Polis, Raban Opis Pengerai, Raban Opis Pengangkut Darat (JPJ) enggau Raban Mekanikal Opis Kereja Raya (JKR).

Entudi ke nya, ku iya bela bisi diatur aktiviti nyambil ba genap endur sida singgah baka ngerami bansal Bejual enggau Pengawa Dagang, Sarawak X-TIVE ti nyerangkung  Program Nembiak, Youth Got Talent enggau eksibisyen ari ejensi perintah.-TVS