Raban pengajar dikearap terus angkunka pengawa diri

Spread the love

SARATOK, 16 Mei: Beserimbai enggau Hari Pengajar taun tu sekeda raban pengajar ari Sekula Primari (SK) Saint Peter ditu bisi mansutka timbal bekaul enggau rambai jaku ‘Guru Insani Pemangkin Generasi Madani’.

Nyadi lebuh dirandau TVS ba sekula nya empai lama, munyi tu ku penemu enggau pesan Hari Pengajar ari bala sida;

Penulung Kanan Administrasyen SK St Peter Lim Sagoh, 58 taun  ngarapka taun ngena rambai jaku ‘Guru Insani Pemangkin Generasi Madani’ ulih nyungkak semangat baru pengajar ransing agi ngajar ba taun ke baru.

Lim Sagoh, 58

“Meri Selamat Hari Guru 2023 ngagai semua bala Pengajar di menua Sarawak sereta Malaysia ngarap ke taun tu ngena rambai jaku ‘Guru Insani Pemangkin Generasi Madani’ ulih nyungkak semangat baru ba taun ke baru.Pia mega arap ke semua perambu ke udah dilanggur ulih dikereja ke enggau manah ba taun ke baru,” ku iya.

Siku agi pengajar SK St. Peter Lena Ajut, 44 taun madah arap raban ke sama nyadi pengajar terus angkun ke pengawa diri enggau ati tuchi ngambika sida bela enda ngasai ke pengawa ngajar nya siti pengawa ti berat.

Lena Ajut, 44

“Beserimbai enggau Hari Guru ke taun tu, ngarap ke kitai ke mangku pengawa nyadi pengajar tu sama-sama berati lalu bechuan ke rambai jaku Hari Pengajar taun iya nya ‘Guru Insani Pemangkin Generasi Madani’.

“Arap ke kitai sama nyadi pengajar ti angkun ke pengawa diri enggau ati tuchi ngambi ke kitai enda ngasai ke pengawa ngajar nya siti pengawa ti berat…Selamat Hari Guru,” ku iya.

Pia mega ku agi pengajar biak ba SK St. Peter Patricia Tasha, 26 taun madahka ngarapka semua pengajar terus mujur enggau besemangat agi napi pemar ba dunya pelajar seriris enggau rambai jaku Hari Pengajar 2023.

Patricia Tasha , 26

“Aku deka meri Selamat Hari Pengajar ngagai semua bala Pengajar ba menua Malaysia tu ngarap ke kitai terus maju jaya udah besemangat napi pemar ba dunya pelajar tu ngambika seriris enggau rambai jaku Hari Pengajar taun tu,” ku iya.

Berebak enggau nya, dua iku nembiak ari sekula nya bela meri pesan Hari Pengajar ngagai semua pengajar ke udah ngajar sida.

Ku Emelda Dinda Stanley, 12 taun ngarapka bala pengajar meruan ngajar sida (nembiak) enggau naka ulih laban enti nadai pengajar sapa.

Emelda Dinda Stanley, 12

“Selamat Hari Guru nuju bala Pengajar ba selampur menua Sarawak lebih agi ba sekula kami tu (SK Saint Peter Saratok).

“Aku ngarap ke bala pengajar meruan ngajar kami enggau naka ulih lalu aku ngarap ke bulih penemu enggau pengelandik laban enti nadai pengajar sapa mih kami tu,” ku iya.

Udah nya, ku Broyd Thrazendry Brynwagon, 12 taun besampika semua bala pengajar meruan gerai lalu meri terima kasih ke semua bala pengajar ke udah ngajar sida ari Primari 1 nyentuk ke Primari 6.

Broyd Thrazendry Brynwagon, 12

“Selamat Hari Guru ngagai bala pengajar ngarap ke semua bala pengajar meruan gerai.

“Terima Kasih laban udah ngajar kami kenyau ari mit (Primari 1) nyentuk kami udah besai diatu (Primari 6),” ku iya. -TVS


Join our social media channel to get our news Alerts and highlights.

Leave a Reply

Your email address will not be published.