KUCHING, 22 April: Rayat Sarawak dilalau terus  nyaga pengelikun enggau pengelantang ke udah meruan di nengeri tu.

Tuai Pemegai Menua (TYT) Sarawak, Tun Pehin Sri Abdul Taib Mahmud madah, pengelantang ke diasai rayat diatu iya nya asil ari pemanah kaul penyerakup pupu bansa ti seruran bebasaka pangan diri enda ngira bansa, pengarap enggau budaya.

“Tu mih penyelai kitai di Sarawak enggau ke patut dikemegahka kitai, ba awak ke sama kitai patut nyeliahka ekstremisme bansa enggau pengarap ba rayat ti mayuh pupu bansa enggau pengarap.

“Kitai patut lantang ati ngagai Allah SWT laban Sarawak udah nyadi teladan ungkup semua menua kitai di Malaysia ke alai semua ulih ngintu penyelai pupu bansa kitai dalam semua pengerami di Sarawak sekalika Hari Raya, Gawai Dayak, Krismas, Hari Wesak enggau Taun Baru China,” ku iya.

Iya mansutka jaku nengah jaku Pesan Khas beserimbai enggau Pengerami Hari Raya Aidilfitri 2023.

Ku iya nambah, Sarawak mega udah nyadi chunto laban nengeri tu entara nengeri ti keterubah numbuhka Unit Pekara Pengarap Bukai (UNIFOR) ke alai pengelantang semua pengarap dijaga enggau manah.

Ke penemu, TYT enggau bini iya, bisi ngatur Pengerami Ngelaluka Pengabang Hari Raya Aidilfitri ba hari keterubah ba Astana Negeri.

Hari Raya keterubah pengawa ngelaluka pengabang nya diatur berengkah pukul 11 pagi nyentuk 1 tengah hari enggau ari pukul 2.30 lemai nyentuk pukul 4.30 lemai.

Bepelasarka penerang ari Astana Nengeri sebedau tu, ba hari keterubah, Tun Taib dan Toh Puan deka nerima penatai pengabang menteri-menteri kabinet nengeri sereta pemesai di menua tu.

Udah nya, ba hari kedua Hari Raya pengawa ngelaluka pengabang nya diatur pukul  11.00 pagi nyentuk  pukul 1.00 ngalih hari khas ungkup ketuai opis perintah, sektor peribit enggau rayat mayuh. -TVS