TATAU, 5 Feb: Program Anti Dadah ti diatur ninting pun taun renggat sekula ba baruh Opis Menteri Pelajar Malaysia (KPM) nengah Unit Pelajar Ngemunaska Dadah chukup beguna dikena narak raban nembiak nyeliahka diri ari teparuk enggau ulah enda menuku.

Ku Sekretari Eksekutif Gerempung Pemunas  Dadah Malaysia (PEMADAM) Nengeri Sarawak ti mega Penulung Direktor Pekara Nembiak, Opis Pelajar Nengeri Sarawak Munawwar Ismail madah, nengah program nya nembiak deka bisi pemereti senentang penanggul enggau empas ti nuntung sida enti teparuk enggau ulah salah guna dadah sereta jenayah ke bekaul.

“Program baka seminar anti dadah ti diberi Agensi Antidadah Kebangsaan (AADK), anti buli enggau nginsap ti diberi Opis tasat enggau Jenayah Pelilih Bintulu, Demonstrasyen Ukui Penyidi K9, Demonstrasyen Lunsin enggau Eksibisyen ‘Taju Remaung’ AADK.

“Semua program tu chukup manah enggau ngembuan reti ke besai ba pengawa nagang ba renggat tumu senutuk enggau pejuluk program “Lebih Baik Cegah” sereta patut diatur semanjai taun,” ku iya madah nengah teks jaku iya ti dibacha pengari iya, Penulung PPD Unit Pekara Nembiak, PPD Tatau/Sebauh Luta Bigam rambau bejadika Program Lebih Baik Cegah (Bebas Jenayah dan Dadah) ba Dewan Utama, SK Kelawit, Tatau, kemari.

Nangkan ke nya, iya nerangka ngatur program PPda enggau anti buli ba sekula mega tau suah diatur ke nyerangkung program kuiz, nero poster sereta meri penerang senentang penusah ke tau nyadi ngagai siku-siku orang ke salah nguna dadah.

“Opis Pelajar Pelilih (PPD) Tatau deka ngungkupka sepenyampau  RM1000 ngagai tetiap sekula primari di Pelilih Tatau, sekula sekondari udah diungkupka sepenyampau RM1000 sebedau tu dikena ngatur Program Anti Dadah.

“Kelimpah ari nya, PPD Tatau Sebauh deka ngatur pekit Lorong Anti Dadah ti mai tuju ngiga pengari ke ulih dianjung bepekit ba renggat nengeri,” tandu iya.

Beduduk enggau nya, iya ngarapka pemisi turu nya ulih ngemudahka sekula ngatur program ke bekaul lebih agi Program Anti Dadah.

Pengawa nyain setipikit kerejasama entara SK Kelawit enggau  PEMADAM Pelilih Tatau sereta PEMADAM Pelilih Bintulu mega diatur beserimbai enggau program nya.

Program nya mega digulu Kepala pengajar SK Kelawit Janudin Abdul Rahman, Pegawai Tadbir Opis Pelilih Tatau Raden Azamry  Raden Perhan,  Inspektor Rumah JPalan Koreksional Bintulu, Insp Joesauvace Impin Jeluing, Prinsipal SMK Tatau, Dr. Layang Ugek, Penulung Pegawai Komunikasyen Sekula, Koperal Muhammad Ridzwan Sharif.