Bajet 2023: Infrastruktur pemun di Sarawak dikemerat

Spread the love

PULAU PINANG, 24 Jan: Pemansang infrastruktur  di Sarawak enggau Sabah entara pekara ti deka dikemeratka dalam Bajet 2023 ti deka dipejuraika ba bulan baru.

Menteri Besai, Datuk Seri Anwar Ibrahim madah, penemuai iya ke kededua nengeri nya sebedau tu tetemuka agi bisi pengurang besai ari sukut perengkaguna pemun.

Ku iya, kelimpah ari Sarawak enggau Sabah, Pulau Pinang mega deka diberi perati sepengudah nadai dikeibuh dalam bajet sebedau tu.

Iya nerangka, taja pan Pulau Pinang penyungkak chukai ti pemadu besai dalam Malaysia, iya ngaku nengeri nya kurang bulih perati ari sukut agih belanja ari perintah besai.

Anwar mega deka beratika bajet ke lebih besai ungkup Pulau Pinang, Sabah enggau Sarawak, ti diasai iya kurang nerima perati sebedau tu.

“Pekara nya benung dalam perati aku. Taja pan bisi penanggul ari sukut penatai pemisi enggau agih belanja tang kitai deka meri perati laban betul, endang amai Pulau Pinang enda dikemeratka ari sukut agih belanja. Tang pia mega maya aku ke Sabah enggau Sarawak, endang bisi pengurang ti besai laban agih belanja ungkup Pulau Pinang nya mayuh ngagai infrastruktur besai.

“Di Sabah enggau Sarawak nya nyengkaum perengkaguna mit, klinik, sepital, genturung pendiau rayat, sekula repuk. Pekara nya deka dikemeratka kitai,” ku iya lebuh ditanya pengarang berita bekaul dawa sentang Pulau Pinang bulih agih belanja ti mit dalam bajet sebedau tu.

Iya dirandau sepengudah ngulu Pengerami Makai Beserumpu Rayat begulai enggau Menteri Besai di menua asal iya empu di Cherok Tok Kun, Bukit Mertajam, malam Hari Satu.

Pengerami nya digulu beribu iku rayat ti deka ngambi awak betemu enggau Menteri Besai ke sepuluh  ti keterubah iya pulai ke menua asal iya sepengudah dichiri nyadi Menteri Besai kena bulan November ujung taun nyin kemari.

Bajet 2023, deka dibantaika baru kena 24 Februari tu ila, nyengkaum bajet ba sektor digital enggau pengawa betanam betupi moden dikena nentuka ekonomi menua seruran tegap.

Terang Anwar mega, Bajet 2023 nya tetap berundingka perambu bajet perintah ke suba dalam ngelangkar bajet ke baru. – TVS


Join our social media channel to get our news Alerts and highlights.

Leave a Reply

Your email address will not be published.