Puntan lari, siku ‘kaki sabung’ manuk ditan polis

Spread the love

JULAU, 23 Jan: Siku suspek ‘kaki sabung’  manuk ditan polis maya nguji ngelarika diri ba sebuah kelang sabung di Nanga Lango, Entabai ditu lemai kemari.

Lelaki beumur 59 taun nya nguji ngelarika diri begulai enggau raban bukai ke bela benung nyabung manuk tang mih puntan.

Tuai Polis Pelilih Julau, Deputi Superintendan Andam Sulin madah, asil pengawa ngerap  ‘Op Limau’ pukul 1.30 lemai nya, raban polis mujur ngerampas lima iku manuk sabung, siti dachin enggau siti papan burak ngundan tulis gintir tuie manuk deka disabung.

“Suspek nguji ngelarika tang puntan lalu seraban agi lelaki ke bukai betesebar lari ke babas nyeliahka diri ari kena tangkap,” ku iya nengah sebengkah penerang media, Hari Satu.

Ku iya, pekara nya deka dipansik nitihka Seksyen 3(1) Langkah-Langkah Pencegahan dan Penganiayaan Binatang 1962.

“Nyema dituku salah, suspek ulih diukum nitihka  Seksyen 5(3) ordinan ke sama ke ngundan ukum jil tiga bulan tauka tunggu mata duit RM500,” ku iya.

Kenu ku Andam, mensia mayuh ke bisi sebarang penerang bekaul enggau ulah ke enda betul di pelilih Julau ulih madah ngagai polis ke besemak ngena lumur 084-734216. -TVS


Join our social media channel to get our news Alerts and highlights.

Leave a Reply

Your email address will not be published.