MA63: Autonomi pengerai patut diperunding silik -Dr Sim

Spread the love

KUCHING, 23 Jan: Penurun kuasa ba sektor pengerai ba baruh Sempekat Malaysia 1963 (MA63) patut diperunding enggau silik nengah Kaunsil Pengemujur MA63.

Sapit Premier Sarawak, Dato’ Sri Dr Sim Kui Hian madah, perintah Sarawak beratika pekara nya siti pengerembai ti positif bepelasarka jaku jamin ti udah dipansutka Menteri Besai, Dato’ Seri Anwar Ibrahim.

“Pekara pengerai endang pekara ti besai. Kitai deka berunding enggau silik di opis begulai sama enggau Premier (Datuk Patinggi Tan Sri Abang Johari Tun Openg) sereta Dato’ Sri Fadillah (Sapit Menteri Besai) deka ngatur aum tu laban pekara tu deka diperunding ba renggat komiti teknikal.

“Menteri Besai udah nerangka pekara ke bisi dalam sempekat nya ti diutang ngagai kitai (Sarawak), lalu deka diberi ngagai kitai. Pekara ti dikeirauka, iya nya ba penerang silik iya. Kitai mesti nemu penerang silik pekara nya,” ku iya lebuh dirandau pengarang berita rambau pengerami Rumah Tebuka Taun Baru China ti diatur Parti Sa’ati Rayat Sarawak (SUPP), lebuh Hari Minggu.

Berebak enggau nya, Dr Sim ke mega Menteri Pengerai, Pengawa Berumah enggau Kaunsil Kandang Menua madah, rintai menteri enggau pegawai khas ti bisi ngaul mesti nyemetak jaku ba dalam aum nya.

Ku iya, diatu, pekara ti dikemeratka raban menteri iya nya polisi besai seraya ungkup pegawai, sida deka lebih mekuh ngagai penerang dalam sempekat nya.

“Raban pegawai patut berunding baka kami laban ngelama tu dalam aum, menteri semina mekuh ngagai polisi besai. Penerang silik semua diserah ngagai pegawai,” ku iya.

Ba penemuai keterubah Menteri Besai, Dato’ Seri Anwar Ibrahim ke Sarawak, kena 19 enggau 20 Januari tu tadi, nyengkaum deka berundingka autonomi pengerai, iya nyemetak madah pekara ti dikemerat deka diberi ngagai pengawa nuntut Sarawak enggau Sabah ba baruh MA63 ti nyadi pekara ti mesti diputarka enggau lengkas.- TVS


Join our social media channel to get our news Alerts and highlights.

Leave a Reply

Your email address will not be published.