KUCHING, 23 Jan: Sapit Menteri Besai (TPM), Dato’ Sri Fadillah Yusof nyemetak madah, udah datai maya iya, rayat mesti sepenemu besaup dalam ngemansangka ekonomi menua tu.

Ku iya, pengawa mantu rayat deka lebih muntang dipejalaika nyema ulah politik ulih dikurangka.

“Maya kitai beserakup, nya baru kitai ulih mekuh ngagai pengawa merambu dikena ngemansangka menua, kelebih agi ari sukut ekonomi. Kurang enggau orang bepolitik, tang lebih ke agi gawa,” ku iya

Ambika chunto maya pengerami Taun Baru China, Fadillah madahka semangat beserakup ti dikemeranka rayat Sarawak maya ngintu pengerami tu ti enda ngira adat, bansa enggau pengarap, nyadi kunchi pengelantang menua tu.

Ku iya, pekara nya dikemeratka dikena kitai nyingkang nuju adan ke baru iya nya pengelati bansa.

“Ketegal semangat beserakup, ulih begulai sama, nyadi tu mih budaya kitai, kelebih agi di Sarawak, berami enggau ngabang nyadi pengering kitai numbuhka Sarawak ti lebih kuat enggau menua kitai lebih seati, beserakup nuju siti adan ke baru. Iya nya pengelati bansa enggau pengelantang semua rayat,” ku iya.

Iya madah munyi nya ngagai pemberita pengudah ngulu pengerami Rumah Tebuka Taun Baru China diatur Parti Sa’ati Rayat Sarawak (SUPP), lebuh Hari Minggu.- TVS