Raban bujara enggau graduet diperansang mekuhka pengawa bekebun chara fertigasi, hidroponik

Spread the love

BINTULU, 22 Jan: Bala bujang enggau dara (bujara) enggau raban graduet mesti berani ngaul diri ba bidang betanam betupi moden laban nya ulih ngasilka penatai pemisi ngagai sida.

Menteri Industri Pemakai, Komoditi enggau Pemansang Kandang Menua, Dato Sri Dr Stephen Rundi Utom madahka kelimpah ari milih pengawa ba opis enggau ba kompeni, raban graduet mega ulih bekebun chara moden baka fertigasi enggau hidroponik.

Tebal agi, kedua-dua bidang nya diatu nerima peminta ke chukup tinggi kemaya hari.

Dato Sri Dr Stephen Rundi Utom rambau nyuaka chek MRP ba Sebauh. Foto: ADUN Kemena

Ku iya madah, ngaul diri ba pengawa bekebun ukai reti graduet enggai gawa nitihka tikas pelajar ke diambi ba renggat Institut Pelajar Tinggi (IPT), tang, pengawa bekebun meri penguntung ke besai, lebih agi enti sida meras, ransing enggau bisi pengepuh ngemujurka diri ba dalam bidang nya.

“Tetiap iku graduet mesti ngembuan daya semekih, kelimpah ari ngembuan penemu enggau pengelandik ti tinggi,” ku iya madah.

Rundi ke mega Kaban Kunsil Nengeri (ADUN) Kemena nerangka raban bujara tauka graduet mesti nemu ngambi peluang ngemansangka diri nguna penau, penemu sereta pengelandik ke dipelajar ngelama tu.

Iya mansutka jaku nya rambau Program Nyuaka Chek Projek Mit Menua Pesisir (MRP) Bagi Taun 2022 ba Balai Raya Sebauh ensanus.

Berebak enggau nya, Rundi madahka perintah Sarawak bisi langgur deka ngubah Palan Latih Betanam Betupi ba batu 11 Jalai Bintulu-Miri nyadi Agropark dudi hari.

“Tu siti ari chara nyendiaka sebuah palan dikena meri latih ngagai raban nembiak ke bisi pengerindu ngaul diri ba bidang bekebun moden.

“Nembiak ke gawa ba dalam bidang bekebun moden deka bulih asil penatai ke tinggi nguna kos ke murah, seraya enda begunaka mayuh pekereja ti dibanding enggau bekebun chara lama,” tandu iya.

Nangkan ke nya, rambau program nya, iya udah nyerahka MRP sepenyampau RM974,000 ngagai 61 iku penerima ti ngarika Komiti Pengelikun enggau Pemansang Genturung Pendiau (JKKK), Gerempung Ukai Dikuasa Perintah (NGO), kelab sereta serakup ke bekaul. – TVS


Join our social media channel to get our news Alerts and highlights.

Leave a Reply

Your email address will not be published.