Pengeransing Menteri Besai mutarka pekara MA63 dipuji

Spread the love

KUCHING, 20 Jan: Premier Sarawak Datuk Patinggi Tan Sri Abang Johari Tun Openg  muji lalu beterima kasih ke pengeransing Menteri Besai, Datuk Seri Anwar Ibrahim ti bebendar deka mutarka sekeda pekara ke udah dipekat dalam  Sempekat Malaysia 1963 (MA63).

Iya madahka, enti nyema bisi isu teknikal ke nyadi, penanggul nya ulih diputarka, ambika chunto meri kuasa ngagai perintah Sabah enggau Sarawak bejalaika projek ba baruh RM50 juta.

“Enti sema proses bejalaika projek nya lanchar, kitai dipadahka penyampau siling nya deka ditambah.

“Taja pia, pekara ti dikemeratka ba ditu bekaul enggau integriti lebuh kitai bejalaika semua projek ba baruh siti atur ke mesti dititihka kitai,” ku iya.

Abang Johari nerangka, pekara nya chukup beguna ngambi ke genap projek ti digaga bejalai lanchar.

Iya mansutka jaku nya rambau dirandau pemberita pengudah aum  Majlis Pengemujur Sempekat Malaysia 1963 (MA63) di Kuching lebuh Hari Lima.

Kelimpah ari nya, Abang Johari mega beterima kasih ngagai perintah besai ba baruh iring Datuk Seri Anwar Ibrahim laban udah nyiri Sekretari Pekara Wang Sarawak nyadi Kaban Kaunsil Asil Dalam Menua (LHDN) berengkah Hari Lima (20 Januari 2023). – TVS

 

 

 


Join our social media channel to get our news Alerts and highlights.

Leave a Reply

Your email address will not be published.