Projek jalai SSLR disadang tembu penuh 2028

Spread the love

LIMBANG, 15 Jan: Sapit Menteri Industri Pemakai, Komoditi, enggau Pemansang Kandang Menua Datuk Dr Abdul Rahman Ismail madah perintah besai udah ngemendarka agih sepenyampau RM7 bilion  dikena ngaga jalai Sarawak Sabah Link Road (SSLR) ti besambungka menua Lawas enggau Limbang rembus ke Miri.

Iya ke mega Kaban Kunsil Nengeri (ADUN) Bukit Kota madah projek nya benung digaga lalu dipelaba tembu penuh 2028.

Kenu ku iya, pengawa ngaga jalai tu chukup beguna ngagai peranak Limbang lebih agi maya bisi tasah lalu deka lengkas berubat ke Miri kelimpah meri pilih ngagai sida sekalika deka nengah jalai lama ti mansa menua Brunei enggau jalai terus ke Miri enda ibuh nengah menua sepiak nya.

“Perintah Besai udah ngemendarka agih sepenyampau RM7 bilion dikena ngaga jalai ke dikumbai SSLR, Sarawak Sabah Link Road.

“Aku kebendar enda berapa rindu tauka nyebut nya bypass, kitai enda ibuh deka bypass-bypass orang. Kitai agi begunaka menua Brunei,” ku iya.

Iya madah munyi nya maya  maya dirandau  TVS pengudah pengerami Apresiasyen Sepital  Limbang 2022, malam Hari Enam.

Berebak enggau nya, Dr Abdul Rahman madah bisi  17 bengkah endur udah dikelala ba pelilih Limbang deka dikemansang dikena matak penatai temuai luar ngagai pelilih menua nya.

“Pekara ke beguna Limbang tu patut digaga kitai pekara ke ulih matak temuai, tu benung digaga.

“Enggau kitai udah ngelala di Limbang tu bisi 17 bengkah endur patut dikemansang.

“Bisi nya udah bisi, lalu bisi mega benung dikemansang enggau bisi mega dalam perambu. Iya ke udah bisi baka  ‘lumpur bebuak’ udah bisi, jelatung santaba udah bisi, mayuh agi ke udah bisi.

“Taman Tasik Bukit Mas pan udah bisi, tebing sungai pemadu panjai di Sarawak benung digaga, sebagi ari nya udah dibuka,” ku iya.

Sama bisi ngulu program nya Direktor Sepital Limbang Dr Syed Satahkatulah Mohamed Kalik enggau Pegawai Opis Pengerai Bagi Menua Dr Norliza Jusoh.-TVS

 


Join our social media channel to get our news Alerts and highlights.

Leave a Reply

Your email address will not be published.