Sarawak enggau Thailand berunding besilih drama TV

Spread the love

KUCHING, 14 Jan: Dikena ngerichahka agi pengawa ngangkatka main asal komuniti di menua tu, Premier Sarawak Datuk Patinggi Tan Sri Abang Johari Tun Openg madah raban sida benung berunding sentang pengawa besilih drama TV enggau stesyen televisyen Thailand.

Pengawa nya ku iya ukai semina ulih meri pemaik ngagai orang ke meda ari kededua buah menua tang mega ulih ngelakuka Sarawak ngagai rantau Asia kelimpah ngangkatka karya peranak menua tu ngagai tikas entarabansa.

“TVS Sarawak diatu berunding besilih drama enggau TV Thailand, nya kebuah kitai meda drama Thailand bisi pansut ba TVS lalu drama kitai mega bisi pansut ba TV Thailand.

“Peragamka kitai pansut ba Thailand, orang kitai iya ga bebadas, lalu mandangka main asal kitai lalu drama kitai nyadi drama entarabansa abis nadai ba tikas serantau,”ku iya maya bejadika pengerami Anugerah Pedagang Bumiputera Sarawak (AUBS) 2022 ba sebuah hotel ditu, malam tadi..

Ku iya, perintah Sarawak seruran ngelaluka pengemeran seni nempa drama dalam menua enggau raban sida sedia nyaup ari sukut meri bantu belanja.

Berebak enggau nya, Abang Johari mega madah perintah sarawak deka terus negapka industri kreatif menua tu dalam taun tu lalu merambu ngaga studio ba sitak Salak .

Taja nadai nerang enggau nyemetak, Abang Johari madah, tuju pengawa ngaga studio nya dikena meri peluang ngagai pengemeran seni lebih agi raban orang ke biak ngambi bagi dalam industri kreatif.-TVS

 

 

 

 


Join our social media channel to get our news Alerts and highlights.

Leave a Reply

Your email address will not be published.