Pelasar ekonomi, polisi pemansang mai Sarawak terus nyingkang ke mua – Uggah

Spread the love

KUCHING, 12 Jan: Premier Sarawak Tan Sri Datuk Patinggi Abang Johari Tun Openg mujur bejalaika pelasar ekonomi enggau polisi pemansang ke udah ngerandang jalai Sarawak terus nyingkang ke mua.

Sapit Premier Sarawak, Datuk Amar Douglas Uggah Embas nyemetak madah, pemujur nya ulih dipeda nengah mayuh macham inisiatif ti dipejalaika Abang Johari ti nyerangkung Agenda Ekonomi Digital, Strategi Pemansang Pasca COVID-19 2030 (PCDS 2030), penumbuh Ejensi Pemansang Kandang Menua enggau ngemeratka Ekonomi Gadung.

“Sarawak diatu benung ba tunga kuing ke nemban nuju pemansang manggai taun 2030, seraya mai nengeri tu nyadi menua ke pemadu maju sereta ngembuan asil penatai pemisi ke tinggi.

“Semua jaku tauka langgur penemu ti dibantaika Abang Johari ukai retorik tauka kelulu ngapa laban iya bisi timpai ke jauh dikena ngemansangka Sarawak,” ku iya rambau bejaku beserimbai enggau Majlis Amanat Perdana Yang Amat Berhormat Premier Sarawak 2023 lebuh Hari Empat.

Program nya mega digulu Abang Johari enggau bini iya, Puan Sri Datuk Amar Juma’ani Tun Tuanku Bujang, Sapit Premier Sarawak, Dato Sri Dr. Sim Kui Hian, Sekretari Perintah Nengeri, Datuk Amar Mohamad Abu Bakar Marzuki sereta raban menteri enggau temuai ti dipebasa ke bukai.

Beduduk enggau nya, Uggah nerang, Gabungan Parti Sarawak seruran meri sukung penuh enggau pechaya perintah ba baruh iring Abang Johari bisi daya ngemansangka Sarawak.

Ku iya, semua raban GPS semampai teguh bediri ba belakang Premier Sarawak awakka iya terus mujur ngatur menua Sarawak nyentuk ke tikas lebih tinggi. – TVS

 

 

 

 

 

 

 

 

 

 


Join our social media channel to get our news Alerts and highlights.

Leave a Reply

Your email address will not be published.