Sarawak begunaka tebangkar dalam pemansang kuasa hidrogen

Spread the love

KUCHING, 11 Jan: Sarawak endang begunaka nembiak enggau raban graduet ti bisi perambu enggau langgur penemu ke ulih ngemansangka pengeraja asal ba nengeri tu.

Premier Sarawak Datuk Patinggi Tan Sri Abang Johari Tun Openg madah, rayat Sarawak mesti nyikap diri enggau penemu ke nemban dikena ngemansang enggau nambahka guna pengeraja asal ke tau meri pemaik ngagai siku-siku orang, komuniti sereta menua tu.

Sarawak diatu benung mekuhka pemansang kuasa hidrogen ti nyadi siti ari bidang ke ulih mai nengeri tu nyingkang ke mua, seraya ngemeranka industri gadung dikena ngerembaika langgur sereta nambah tikas aktiviti ekonomi ke ulih nyungkak asil penatai pemisi nengeri.

Ku iya, ambika chunto, enti sema bisi penanggul tauka pemar ditapi, mesti bisi chara ke patut diambi dikena mutarka pekara nya.

“Chara dikena mutarka penanggul tu kitai mesti bisi langgur penemu tauka buah runding ke tau nyadi formula dikena mutarka penanggul ke ditapi kitai nya,” ku iya rambau bejadika Pengerami Konvokesyen Ke-7 Palan Penyulut Teknikal Sarawak (CENTEXS) di Kuching lebuh Hari Tiga.

Abang Johari nerang, entara penanggul ke ditapi dunya diatu iya nya isu pengangat dunya tauka ‘global warming’ ti meri empas ngagai gaya hari.

“Nya kebuah, Sarawak ngemeratka kuasa hidrogen sereta pengawa pansik enggau pemansang dikena ngiga chara ke ulih dikena mutarka isu nya.

“Kitai deka betanya ngagai tebangkar ba bidang tu tauka pakar laban ai bisi hidrogen enggau oksigen sereta hidrogen tu siti kuasa baru.

Kitai ba Sarawak mayuh ai baka ari tekad ai baka Batang Ai, Bakun, sungai enggau ujan ti ngasilka ai. Nya kebuah Sarawak beguna idea tauka langgur penemu baru nguna ai ngasilka hidrogen,”

Nangkanka nya, Abang Johari madah pemisi kuasa hidrogen mega deka ngubah gaya ekonomi entarabansa, sereta Sarawak diberi peluang bejaku enggau bedajaka senentang kuasa hidrogen ba renggat dunya.

Nya entara kebuah Sarawak begunaka pengereja pengawa tauka siku-siku orang ke bisi penemu enggau pengelandik ngemansangka hidrogen, lebih agi ngaul rayat Sarawak. – TVS

 

 

 

 

 

 

 


Join our social media channel to get our news Alerts and highlights.

Leave a Reply

Your email address will not be published.