Jalai sementara ari Kota Samarahan ke Kuching dibuka berengkah sehari tu – JKR

Spread the love

KUCHING, 6 Jan: Jalai sementara ari Kota Samarahan ke BDC, Jalai Setia Raja enggau Jalai Stutong dibuka berengkah sehari tu.

Opis Kereja Raya (JKR) madah, tuju jalai nya dibuka dikena meri awak pengawa nyeruri enggau ngemanah jalai  Kuching/Samarahan Expressway.

Taja pan pia, jalai nya semina ulih ditengah entukar ke pemerat lima tan aja.

“Taka pengelaju ti dikemendarka iya nya semina 30km/jam aja.

“Semua penguna dilalau seruran bejimat lebuh deriba ba jalai sementara nya sereta ngemeratka pengelikun diri,” ku JKR nengah siti penerang lebuh Hari Empat.

Jalai sementara nya dibuka berindik ari pengawa ngabas enggau ngemataka kena 4 enggau 5 Januari sereta pengudah aum diatur begulai enggau kompeni ti bejalaika pengawa berumah.

“JKR Samarahan deka madah pengerembai ke pemadu baru ba sebarang maya enti sema bisi ubah hari bulan, jam enggau jalai ba sesebengkah kandang endur ke benung diseruri.

“Penguna jalai mega ditangkan ngatur manah pejalai diri lebih agi enti sema bisi deka nengah tauka ngelawa kandang endur ke bekaul enggau pengawa nya,” ku iya.

Mensia mayuh ke bisi tanya tauka ripot senentang pejalai trafik ba endur nya ulih betelefon ngagai Opis JKR Kota Samarahan ba lumur 082-672800 rambau jam gawa. – TVS

 

 

 


Join our social media channel to get our news Alerts and highlights.

Leave a Reply

Your email address will not be published.