Anang enda ngerikod adat enggau main asal diri – Mabong

Spread the love

KUCHING, 29 Dis: Langgur penemu ti dibantaika Opis Menteri Dagang Temuai, Industri Kreatif enggau Seni Pemerindang nya ti ngasuh ngerikod video tauka ngambi gambar adat enggau main asal 34 etnik ke bisi ba Sarawak disambut manah.

Lebuh dipinta meri timbal penemu bekaul enggau pekara nya, Tuai Akademi Serakup Dayak Iban Sarawak (ASADIA) pampang Kuching, Mabong Unggang madah, nya siti chara ke pemadu nemban dikena ngintu pemanah adat enggau main asal pupu raban bansa ba nengeri tu ulih awakka seruran bisi dipeda enggau dimalin nyentuk jemah ila.

“Main asal, adat asal Sarawak ke dirikod tauka disimpan ba dalam bup tauka dokumentari enda mudah lenyau, seruran ulih dipeda nyentuk dudi hari.

Tuai ASADIA, Mabong Unggang.

“Pengawa baka nya patut diteruska ngambi ulih nyadi chuan enggau teladan, dipansik nembiak rebak dudi. Ambika banding, ASADIA bebendar deka ngangkatka siti main asal Iban ke dikumbai belikan, mayuh orang nanya aku madahka diri enda kala ninga enggau meda. Beduduk enggau nya, aku ngaga pansik, betanya ngagai orang ke Betong, ba kedai ke nemu ngaga Belikan, tang enda nemu main Belikan nya.

“Taja pia, kira benasit manah, ba taun 1958 main asal Belikan tu bisi dirikod orang dijadika dokumentari sereta ditepu ba dalam YouTube,” ku iya lebuh ditanya senentang penemu bekaul enggau perambu opis menteri nya lebuh Hari Tiga.

Berebak enggau nya, Mambong nerang, diatu ASADIA udah mujur ngangkatka Belikan nyadi siti ari main asal pengudah bisi 10 iku orang landik main Belikan enggau ngajat ngena Belikan.

Nya alai, iya setuju pengawa ngerikod sekalika seni, main asal enggau adat asal ba nengeri tu awakka ulih ditemu, dipelajar ukai semina ba Sarawak, tang mega ba Semenanjung Malaysia enggau ba menua luar.

“Pengawa perintah Sarawak ti deka ngerikod adat asal enggau main asal endang patut awakka dalam timpuh 70 taun, 100 taun ila pengawa tu mengkang ulih dipeda sida ke rebak dudi. Tu ngemudahka siku-siku orang ke deka belajarka main asal nya seraya enda lenyau enggau tengelam ngapa,” tandu iya.

Bepelasarka rikod, ASADIA mujur ngajar urung 2,000 iku orang ba mayuh macham pengelandik main asal kenyau akademi nya ditumbuh  ari taun 2013.

Tu nyengkaum pengawa ngajat, betabuh, begendang, bemain belikan enggau nusuk marik sereta ngaga kain burie. – TVS


Join our social media channel to get our news Alerts and highlights.

Leave a Reply

Your email address will not be published.