Kuasa autonomi imigresen nyamin pengelantang Sarawak

Spread the love

KUCHING, 24 Dis: Kuasa autonomi imigresen udah mujur nyamin pengelantang Sarawak lalu ngujungka rayat di nengeri tu berasai chukup betuah laban dijaga ari laya pengarap enggau bansa baka ke suah nyadi ba endur bukai.

Premier Sarawak, Datuk Patinggi  Tan Sri Abang Johari Tun Openg madah, nengah kuasa autonomi imigresen nya dia Sarawak ulih nyekat raban ke ekstremis ba pengarap datai ke nengeri tu.

“Taja pia, Sarawak enda kebal penuh ari penemu-penemu ekstremis ti rembus datai ke Sarawak nengah jalai siber baka media-media rama ti balat ngeringka politik raban ti bekaul.

“Benteng Sarawak ari penemu ke baka tu iya nya begunaka pemintar diri empu nisih pekara ke enda manah sereta nemu milih pekara ke betul,” ku iya nengah Pesan Krismas enggau Taun Baru 2023 ke dibantai Hari Enam.

Nangkan ke nya, Abang Johari madah laban ke nyadi ketuai Perintah Sarawak, dia iya madah diri meri jamin Perintah GPS deka seruran nyaga lebas bepengarap di nengeri tu enggau nadai sebarang ulah ekstremis pengarap diteju ngeruga pengelantang enggau penyerakup rayat pupu bansa di Bumi Kenyalang.

Udah nya, Premeir Sarawak ngarika sida sebilik meri Selamat Hari Krismas ngagai semua rayat Sarawak ke ngintu pengerami ti chukup besai reti ngagai raban Kristian sereta ngarapka taun baru 2023 ulih mai lebih mayuh agi pemujur ngagai Sarawak enggau rayat.

“Aku ngarapka pengerami Krismas mai berekat ngagai bala menyadi lalu berami mih enggau ati gaga begulai enggau diri sebilik, kaban belayan enggau bala bakih ke semak.

“Kitai bela nemu tu mih hari ke dianti-anti raban Kristian nyadika tuchung pengarap. Taja pia, nama pekara ke nyelai di Sarawak iya nya raban pengarap bukai mega bekunsi pengaga ati enggau bala bakih sida ke bepengarap Kristan rambau musin pengerami tu,” ku iya.

Pia mega, Abang Johari madah semina ba Sarawak kitai ulih meda ruang bilik bepengarap Kristian enggau bepengarap Islam ulih idup serumah.

“Di Sarawak mega, gerija enggau masjid nadai penanggul dientak berimbai lalu bela betulung pangan diri baka diri menyadi,” ku terang iya.- TVS

 


Join our social media channel to get our news Alerts and highlights.

Leave a Reply

Your email address will not be published.