Aku menteri ungkup semua, ukai semina ungkup Sarawak – Nanta

Spread the love

KUCHING, 2 Nov: Menteri Kereja Raya Datuk Seri Alexander Nanta Linggi nyemetak madah diri deka nyadi menteri ungkup semua (rayat Malaysia) lalu ukai semina ungkup Sarawak.

Iya ke mega baru dipadu nyadi Menteri Kereja Raya madah beduduk ari nya, iya deka nentuka semua pengawa enggau inisiatif ke digaga opis menteri sebedau tu deka meri pemaik ngagai semua rayat Malaysia nyengkaum Sabah enggau Sarawak.

“Bekau ari penumbuh kabinet baru dibaruh Perintah Penyerakup tu, aku ngarapka genap iku kitai ulih terus nyingkang ke mua sereta meri saran ngagai pengawa nyumanka menua, lebih agi ari sukut ekonomi enggau pengelantang rayat.

“Aram mih kitai ngiarka semua bida lalu begulai meri perati ngagai pengawa ngemansangka baru menua ngambika pulai baru ba arung ke betul awakka dibasa ba mata dunya,” ku iya nengah sebengkah penerang ke dibantai pengudah tusun menteri kabinet baru tembu dibantaika Menteri Besai Datuk Seri Anwar Ibrahim malam tu tadi.

Nangkan ke nya, Nanta madah diri nemu tanggungpengawa ke diberi nya siti pangku pengawa chukup mar tang iya besemaya deka bebendar nentuka pemujur tusun pengawa ngatur menua nengah pangku pengawa ke udah dilempai ngagai iya ba Opis Menteri Kereja Raya.

“Aku meri jamin deka neruska polisi-polisi Opis Menteri sebedau tu ke udah nyengala mujur kelimpah ngemanah agi polisi-polisi opis menteri ke ulih meri pemaik ngagai rayat enggau menua.

“Aku mega deka bebasaka tanggungpengawa pengereja pengawa perintah ari semua renggat opis menteri ke udah mayuh meri penemu enggau pengiruh ngagai opis menteri tu.

“Kitai deka terus begulai gawa dalam siti tim ungkup menua ke disayau,” ku iya.-TVS

 


Join our social media channel to get our news Alerts and highlights.

Leave a Reply

Your email address will not be published.