Julau enda tinggal ngasaika pemansang

Spread the love

JULAU, 18 Nov: Parlimen Julau lebih agi sitak Kunsil Nengeri (DUN) Meluan mega enda tinggal ngasaika pemansang ke dibai perintah Sarawak nengah inisiatif ti dipejalaika Premier Sarawak, Datuk Patinggi Tan Sri Abang Johari Tun Openg.

Ku Kaban Kunsil Nengeri (ADUN) N.48 Meluan, Rolland Duat Jubin, projek pemansang ba baruh singkang ke strategik perintah meri pemaik ke besai ngagai rayat ke mendam ba sitak nya.

“Entara pemansang nya baka jalai alun, grid karan enggau sistem telekomunikasyen ke diatu ulih diasaika peranak Meluan.

“Kitai ulih meda ba DUN Meluan, semua rumah panjai udah disikap  grid karan ti nguna ungkus belanja penyampau RM75 juta.

“Sekeda rumah panjai ke bedau datai jalai, aku ke nyadi pengari rayat benung senaka ulih deka mai pemansang infrastrakcha nya. Aku mega udah minta Program Skim Elektrik Alternatif Luar Bandar Sarawak (SARES) ke nguna belanja penyampau RM21 juta, sereta naka ke diatu, semua rumah panjai udah bisi lampu,” ku iya rambau Program Tuai Begulai Enggau Rayat Julau ti dipejadika Premier Sarawak, Datuk Patinggi Tan Sri Abang Johari Tun Openg, kemari.

Rolland nerang, Parlimen Julau ke mungkur DUN Meluan enggau Pakan dijangka deka ngasaika lebih mayuh projek pemansang ti dibai perintah GPS laban kedua-dua sitak nya diatu udah disengkaum ba baruh Ejensi Pemansang Delta Rajang.

Ku iya, pemisi ejensi nya ngemudahka sida merambu pemansang nitihka chuan diri seriran enggau peminta ti dirandaka rayat.

“Pelilih Julau agi begunaka mayuh pemansang. Beduduk ari nya, aku nengah awak tu beterima kasih ngagai perintah Sarawak laban udah numbuhka Ejensi Pemansang Delta Rajang ke mega mungkur sitak kitai ba Julau,” ku tandu iya.

Berindik ari nya, iya ngelalau rayat Julau terus segulai sejalai, saum runding nyukung Gabungan Parti Sarawak (GPS) dikena nentuka pemansang ke diperambu perintah ulih dipejalaika ba Julau.

Iya madah, pemansang ke lebih berurun ulih dikerembaika nengah kerejasama ti rat entara perintah nengeri enggau perintah besai, tebal agi enti sema Kaban Parlimen Julau ari GPS.

Sama datai iya nya Sapit Menteri Pengatur Mengeri, Tanah Enggau Rampa Menua, Datuk Len Talif Salleh, Sapit Sekretari Perintah Sarawak (Pengatur Ekonomi Enggau Pemansang), Datu Dr Muhammad Abdullah Zaidel, Kaban Kunsil Nengeri (ADUN) Meluan, Rolland Duat Jubin, ADUN Meradong, Datuk Ding Kuong Hiing, ADUN Ngemah, Anyi Jana, ADUN Pakan, Tan Sri Dato Sri William Mawan Ikom Enggau Chalun Gabungan Parti Sarawak (GPS) Parlimen Julau, Datuk Joseph Salang Gandum sereta ke bukai. – TVS

Tags: #ib

Join our social media channel to get our news Alerts and highlights.

Leave a Reply

Your email address will not be published.