Chalun GPS Bintulu ngembuan rikod ti manah

Spread the love

NIAH, 18 Nov: Rayat lebih agi ke nguan sitak Niah dilalau enda bejudika nasip jemah lebuh salah pilih chalun ba Pengawa Bepilih Besai Ke-15 (PRU-15) tu.

Nampung berita di UKAS, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom madahka Gabungan Parti Sarawak (GPS) mantaika Datuk Seri Tiong King Sing nyadi chalun ba sitak Parlimen Bintulu.

Ku iya, Datuk Tiong ngembuan rikod ti manah sepanjai 20 taun megai sitak Parlimen Bintulu ke alai rayat patut ngingatka jasa iya ngagai rayat di sitak nya.

“Rayat patut berunding panjai ngambika enda ngelepaska chalun GPS tu lalu ngundi chalun bukai ke bedau tentu ulih meri pemansang sereta ulih nyadi tuai.” ku iya.

Iya madah munyi nya lebuh bejaku bejadika Program Agriculture Community Outreach Programme (AgriCorp) bepalan di Rumah Lawrence Bana, Suai, kemari.

Nangkanka nya ku Rundi rayat di nengeri tu enda begunaka parti ari Semenanjung nyadi tuai di nengeri tu laban Sarawak udah bisi GPS iya nya parti menua ti meretika senentang peminta sereta aspirasyen rayat Sarawak.

Rayat ke nguan Suai patut berunding panjai sereta ngundi chalun ti ransing dalam bejalaika pengawa ngambika ulih mai sereta ngenyarihka sada nyawa rayat di Dewan Parlimen.

Sama bisi ngulu program tu iya nya Sekretari Mendam ba Opis Menteri Industri Pemakai, Komoditi enggau Pemansang Kandang Menua Sarawak Datu Edwin Abit, Pemangku Direktor Opis Betanam Betupi Sarawak Dominic Chunggat, Sekretari Politik Premier Sarawak Jenny Banga, Pegawai Tadbir Sarawak Niah, Philip Abing, Pegawai Opis Betanam Betupi Begian Miri, Hafriz Razak enggau Tuai Rumah Lawrence Bana. – TVS

Tags: #ib, #pru15

Join our social media channel to get our news Alerts and highlights.

Leave a Reply

Your email address will not be published.