Pekara MA63 patut diputar tekala nya, ukai agi berenggat – Dr Nielson

Spread the love

KUCHING, 17 Nov: Parti ke mujur menang rambau Pengawa Bepilih Besai PRU Ke-15 (PRU-15) tu sereta ulih numbuhka perintah besai ba Kuala Lumpur patut terus bejalaika semua pekara ke udah disemaya ba baruh Sempekat Malaysia 1963 (MA63), pia ku Dekan Fakulti Sains Sosial dan Kemanusiaan Universiti Malaysia Sarawak (UNIMAS), Prof. Dr. Neilson Ilan Mersat.

“Sapa ke megai perintah besai kena 20 November tu ba Kuala Lumpur, enggau siku-siku orang ke ngangkat sumpah nyadi menteri besai mua ke pagi sehari nya, lalu mua ke lemai iya patut ngamatka semua pekara ke udah disemaya ba MA63 tekala nya ungkup Sabah enggau Sarawak,” ku iya nengah program randau Malaysia Decides diatur TVS bejuraika topik ‘Undi Nuan Penentu Kuing Menua, malam tadi.

Ku iya, enti ulih sekeda pekara ke bedau teputar manah ba dalam sempekat nya anang dipejalaika nengah chara berenggat laban bedau temu kemaya juluk nya ulih dikeamat.

“Lebuh kitai nyebut nguna chara berenggat tu, bedau temu kemaya ulih nyadi nyata. Serenggat nya ulih nyadi dua taun, tiga taun tauka lebih ari nya.

“Pekara tu udah lama tejanggal lebih 50 taun ke udah, tang apin teputar enggau dikeamatka perintah besai,” ku iya.

Berebak ari nya. Dr. Nielson nerangka, semaya deka mutarka pekara nya berenggat sigi manah, tang suah tauka kala disebut sebedau tu ti ngujungka orang nyau bansu sereta leju ninga penemu baka nya.

Nya alai, iya madah, sapa ke mujur megai perintah besai udah PRU-15 tu patut ngamatka danji nya laban endang tangkup pengawa sida (perintah besai) bejalaika pekara ba baruh MA63.

Sebedau tu, maya nemuai gawa ke Selangau empai lama dia Menteri Besai Datuk Seri Ismail Sabri Yaakob bisi mansutka penemu madah deka meri komitmen iya mutarka semua pekara ke apin teputar ba MA63 nengah chara berenggat.

Ismail Sabri ke mega Chairman Komiti Khas MA63 madah, pengawa nya dipejalaika dikena nentuka tetiap pekara ke disempekat ba MA63 ulih dipejalaika ungkup ubah ke besai ba nengeri Sabah enggau Sarawak dudi hari. -TVS


Join our social media channel to get our news Alerts and highlights.

Leave a Reply

Your email address will not be published.