Atur perintah meri kemisi dua hari endur pulai ngundi dipuji

Spread the love

SIBU, 17 Nov: Atur perintah menua enggau perintah nengeri meri kemisi dua hari ungkup ngemuntangka pengawa nurun ngundi kena 19 November tu nerima puji ari mensia mayuh.

Siku pengundi di Parlimen Sibu, Hamzi Padlam madah, kemisi dua hari tu manah bendar laban rayat endang patut bejalaika tanggungpengawa ngundi PRU-15 dikena nentuka sapa perintah ti megai menua udah tu.

“Aku ngarap semua ke tau ngundi bela sampai nurun laban enti ukai kitai sapa agi ke deka milih enggau nentuka baka ni tunga kuing menua kitai Sarawak dudi hari ila,” ku iya maya dirandau pemberita TVS, sehari tu tadi.

Nangkanka nya, Azira Abdullah ke mendam di mengeri Sibu ngelalau mensia mayuh nguna manah peluang ke bisi nurun ngundi laban nya udah tanggungpengawa nyadi rayat Malaysia.

“Ngundi mih kitai laban nya udah tanggung pengawa kitai nyadi rayat Malaysia, nadai guna kitai bejaku ngapa ba sebelah kedai kupi aja, maya tu mih kitai nentuka sapa ke deka dipilih kitai nyadi pengari rayat ke manah,”ku iya.

Siku agi pengundi ditu ke mega padagang di Tamu Sibu Jaya, Ismail Let ngarap pengundi ba PRU15 sekali tu manggai 90 peratus.

“Aku ngarap pengundi manggai 80 peratus tauka 90 peratus ngundi sekali tu laban kitai udah diberi perintah kemisi khas,” ku iya.

Sepenemu enggau Ismail, ku Marzuki Osman mega ngelalau pengundi biak enggau tuai lantang ati bejalaika tanggung pengawa ngundi.

“Lalau aku ngagai pengundi ditu, guna manah peluang ke diberi perintah. Datai mih maya hari ngundi,” ku iya,

Komiti Pengawa Bepilih (SPR) udah netapka hari ngundi Pengawa Bepilih Besai Ke-15 (PRU15) diatur kena 19 November tu.

Sebedau tu, Opis Premier Sarawak, udah mansutka penerang iya nya perintah nengeri nitihka atur perintah besai meri hari kemisi dua hari iya nya kena 18 enggau 19 November endur meri awak ngagai pengundi ke jauh ari palan ngundi mulaika diri ngagai endur sida ngundi. -TVS

 

 

Tags: #ib, #pru15

Join our social media channel to get our news Alerts and highlights.

Leave a Reply

Your email address will not be published.