Dua taun agi Sarawak deka ngasaika bungkur penuh internet

Spread the love

SELANGAU, 15 Nov: Sarawak dipelaba deka nyapai 100 peratus bungkur penuh internet dalam timpuh dua taun agi dibaruh pelin ‘Jalinan Digital Negara’ (JENDELA).

Pekara nya dipansutka Menteri Besai, Datuk Seri Ismail Sabri Yaakob bekau ari penyikap nyendiaka 636 palan infrastruktur digital ke udah dipejalaika ba serata Sarawak.

“Sehari tu kitai meri kereban gajet siswa ngagai mahasiswa di Sarawak, tang nya nadai reti enti sida enda ulih nguna kereban nya, taja bulih kereban nya enggau enda bebayar ketegal ti nadai arus internet.

“Nya alai, kitai patut nyikap arus internet di Sarawak tu 100 peratus dalam timpuh nya,” ku iya maya bejadika Projek Jalai Besai Pan Borneo Seksyen Selangau WPC08.

Ba pengerami nya, bisi 25 gajet siswa diagih ngagai mahasiswa datai ari palan pelajar tinggi ba sitak tengah Sarawak.

Naka tu, bisi 16,505 tablet udh disadung ba Sarawak lalu ari penyampau nya 22,265 peminta udah dikemendar.

Berebak enggau nya, Ismail madah iya deka ngenulu ke peminta rayat Sarawak nyema iya menang ba Pengawa Bepilih Besai Ke-15 (PRU-15).

“Aku laban ke nyadi chairman komiti khas Sempekat Malaysia 1963 (MA63) deka nentuka semua ke dikelaung ngelama tu dipulai ke pemaik rayat Sarawak.

“Perintah Besai tentu enda ulih bediri kediri enti nadai sukung ari Gabungan Parti Sarawak (GPS),” ku tandu iya. – TVS

 


Join our social media channel to get our news Alerts and highlights.

Leave a Reply

Your email address will not be published.