Chalun GPS mesti menang di Baram – Gerawat

Spread the love

MARUDI: Chalun Gabungan Parti (GPS) Datuk Anyi Ngau mesti menang besai ba Parlimen Baram rambau Pengawa Bepilih Besai Ke-15 (PRU-15) tu ngambika sada rayat Baram lebih nyarih agi didinga ba renggat Parlimen.

Nampung penerang UKAS, dia Sapit Menteri ba Opis Premier (Orang Gawa, Imigresen enggau Pematau Projek), Datuk Gerawat Gala, pemujur tu deka nentuka Baram terus ngasaika pemansang ti dibai perintah sekalika ari perintah besai enggau perintah nengeri.

“GPS mesti menang besai ba Parlimen Baram ngambika perintah besai ulih ninga sada pengari rayat ari Baram, lebih agi nyadaka penanggul ke ditapi enggau pemansang ti dirandaka rayat,” ku iya rambau ngulu Program Tuai Begulai Enggau Rayat ba Rumah Umbar Sungai Melikat,Hari Satu.

Gerawat ke mega Kaban Kunsil Nengeri (ADUN) Mulu nerangka, pengundi ba sitak Baram sigi diperansang nurun ngundi kena 19 November tu laban nya siti ari tangkup pengawa sida ke nyadi rayat menua tu.

“Pengundi ba Baram endang dilalau nurun ngundi sereta meri sukung ke penuh ngagai chalun GPS.

“Perintah Sarawak ba baruh GPS seruran meri perati peminta guna enggau pekara ti meri pemaik enggau pengelantang ngagai rayat di nengeri tu nyerangkung di kandang menua ulu enggau menua pesisir.” ku iya.

Ba pengerembai bukai, maya nemuai ke Rumah Billy Singai Engkaras ba hari ke sama, Gerawat madah, tetiap penanggul enggau sebana ari rayat didinga perintah dulu sebedau ngiga chara ti nemban dikena mutarka pekara nya.

“Ambika chunto, Rumah Billy Sungai Engkaras iya nya rumah panjai baru ke diatu agi benung ba dalam renggat digaga.

“Penyampau RM40,000 duit turu ari geran Projek Mit Menua Pesisir (MRP) udah diungkupka dikena bejalaika pengawa nimbuk enggau ngelandaika taba rumah panjai tu,” ku iya.

Entudika nya, penyampau RM3,500 diberi ngagai Serakup Indu Dayak Sarawak Unit Rumah Billy.

Rambau PRU-15 tu, chalun Gabungan Parti Sarawak (GPS), Datuk Anyi Ngau besatup enggau Roland Engan (PH-PKR) sereta Wilfred Entika Rebai (Bibas).

Bepelasarka rikod, PRU-14 ke diatur ba taun 2018, Anyi mujur ngetanka kerusi Parlimen Baram pengudah ngalahka Roland enggau majoriti undi 1,990.-TVS


Join our social media channel to get our news Alerts and highlights.

Leave a Reply

Your email address will not be published.