Nempa modal mensia bepelajar tinggi entara inisiatif dikemerat perintah

Spread the love

TATAU, 14 Nov: Siti inisiatif ti diberi perati perintah Sarawak iya nya deka nempa modal mensia ke bisi pelajar tinggi ngambika ulih nyaup ngemansangka nengeri.

Menteri ba Opis Premier Sarawak, Datuk John Sikie Tayai madah, pekara nya senutuk enggau juluk Sarawak ti suah dikemeratka Premier, deka nempa nengeri tu maju sereta bepenatai pemisi tinggi manggai taun 2030.

“Pekara pelajar sigi dikemerat laban nya siti chara dikena kitai ngangkatka ekonomi ruang bilik.

“Nya entara kebuah perintah Gabungan Parti Sarawak (GPS) meransang apai indai nentuka anak sida bulih  pelajar ke manah sereta ukai semina ngelempaika pengawa ngajar enggau ngembing nembiak ngagai pengajar aja,” ku iya rambau Program Lumba Ninting Taun Sekula enggau Karnival PIBG SK Rumah Tayai Kali Ke-10/2022 di SK Rumah Tayai, Tatau ensanus.

Beduduk ari nya, John ke mega Kaban Kunsil Nengeri (ADUN) Kakus madah, karnival PIBG enggau program lumba nya ulih nyadi pelantar dikena negutka kerejasama enggau kaul entara apai indai, staf sekula enggau nembiak.

“Sekula tu ditumbuhka kenyau ari taun 1959. Sigi nyadi tanggungpengawa semua kitai ngintu enggau ngemansangka sekula tu awakka nembiak bulih pemujur,” ku iya.

Iya madah, perintah Sarawak deka numbuhka Turu Pesaka Bansa ke ulih nyendiaka agih belanja dikena mantu anak Sarawak ba bidang pelajar, tebal agi pelajar pechuma nyentuk ke tikas universiti.

“Nya entara pemaik ke ulih diasaika kitai ke nyadi rayat Sarawak ba baruh GPS ti diiring Premier Sarawak, Datuk Patinggi Tan Sri Abang Johari Tun Openg.

“Rambau Pengawa Bepilih Besai Ke-15 (PRU-15) tu, kitai mesti milih chalun GPS ngambika aku enggau iya (chalun GPS Selangau) ulih terus mai pemansang ke sitak Kakus sereta nyendiaka ungkup ke diguna   sekula,” ku iya.

Pugu 10 ba dalam Manifesto GPS iya nya ngemansangka modal mensia bekualiti nengah pelajar latih teknikal enggau vokasional laban raban orang biak nyadi pengerandang pemansang ba mayuh macham bidang dudi hari. – TVS


Join our social media channel to get our news Alerts and highlights.

Leave a Reply

Your email address will not be published.