Edwin Banta nemu pemansang dirandaka rayat Selangau

Spread the love

SELANGAU, 14 Nov: Pengundi ba sitak Parlimen Selangau ari semua parti komponen GPS iya nya Parti Pesaka Bumiputera Bersatu (PBB), Parti Rakyat Sarawak (PRS), Parti Demokratik Progesif (PDP) enggau Parti Sa’ati Rayat Sarawak (SUPP) diperansang sepenemu nentuka chalun iya, Edwin Banta ulih menang ba Pengawa Bepilih Besai Ke-15 (PRU-15).

Sapit Premier Sarawak, Datuk Amar Douglas Uggah Embas madah, raban tuai GPS udah milih Edwin nyadi chalun bediri ba Parlimen Selangau laban arapka iya ulih menang nyadi pengari rayat.

“Edwin udah dikelala mensia mayuh, bisi peneleba enggau perambu ke ulih dikena ngemansangka sitak Selangau.

“Iya kala nyadi Sekretari Politik Premier kenyau ari taun 2016 udah mayuh bejalai enggau meda gaya pemansang enggau pekara ti dirandaka rayat sereta besemaya deka ngintu manah pengelantang rayat di sitak tu,” ku iya madah rambau Program Tuai Begulai Enggau Rayat ba Rumah Sigan, Ulu Arip lebuh Hari Minggu.

Uggah ke mega Sapit Presiden Parti Pesaka Bumiputera Bersatu (PBB) nerangka, Presiden PBB Datuk Patinggi Tan Sri Abang Johari Tun Openg minta semua kaban PBB ba sitak Kunsil Nengeri (DUN) Kakus enggau Tamin meri sukung ke penuh ngagai chalun GPS di Parlimen Selangau.

Ku iya, polisi perintah GPS mekuhka pemansang enggau pengelantang ke ngaul rayat pupu bansa di nengeri tu enda malik bida bansa, batang pengarap enggau asal penatai.

“Kami ke nyadi pengari rayat enggau menteri endang ngemeratka semua pengelantang raban bansa di serata Sarawak awakka nadai siku rayat tinggal ari ngasaika pemansang, bantu sereta inisiatif ti disediaka perintah GPS,” ku iya madah agi.

Bepelasarka rikod, rambau PRU-14, Baru Bian ti ngarika Parti Keadilan Rakyat (PKR) menang ba kerusi Parlimen Selangau nengah majoriti 486 undi pengudah ngalahka Rita Insol ari Barisan Nasional (BN).

Taja pan pia, serak tu, Baru Bian enda ngetanka kerusi Parlimen Selangau tang milih bediri ba kerusi Parlimen Lawas.

Edwin Banta deka besatup enggau Umpang Sabang (PH-PKR) enggau Henry Joseph (Bibas) ba PRU-15 tu. – TVS


Join our social media channel to get our news Alerts and highlights.

Leave a Reply

Your email address will not be published.