GPS mekuhka pengelantang pendiau rayat di menua pesisir – Aaron Ago

Spread the love

KANOWIT, 10 Nov: Perintah Gabungan Parti Sarawak (GPS) mujur ngangkatka penegap politik, ekonomi enggau rama ngambika pemansang ba serata Sarawak ulih terus diperati, lebih agi di kandang menua pesisir.

Chalun GPS ba Parlimen Kanowit, Datuk Aaron Ago Dagang madah, endang beguna amat rayat di sitak Kanowit meri sukung ti penuh ngagai perintah GPS ke udah nyata bisi daya nyamin pemaik enggau pengelantang pendiau rayat.

“Naka ke diatu, perintah GPS udah mujur bejalaika projek pemansang nguna asil nengeri tu empu sereta enda bepanggai ba duit turu ari perintah besai,” ku iya rambau bejaku ba program  Randau Ruai Begulai enggau Chalun GPS Parlimen Kanowit di Rumah Belayong, Nanga Dap enggau Rumah Tingai, Ulu Pidai ensanus.

Entudika nya, iya ke mega Sapit Menteri Pengerai II nyemetak madah, chalun ari parti penyakal enggau bibas semina ngemeratka pemaik diri aja sereta enda beati amat deka ngangkatka pendiau rayat ke mendam di Kanowit.

“Penyakal semina ayan enggau ransing gawa rambau pengawa bepilih besai aja. Udah nya sida ngelenyauka diri pengudah pengawa ngundi tembu diatur,” ku iya.

Aaron nerangka, sada Sarawak deka nyarih agi didinga ba Parlimen enti sema rayat terus milih chalun GPS, lebih agi ngintu enggau ngetanka hak rayat enggau nengeri tu ba renggat perintah besai.

Sebedau tu, iya madah deka majak mekuhka pemansang infrastrakcha, sektor pelajar enggau ekonomi di Kanowit enti sema dipilih baru nyadi pengari rayat.

Bepelasarka rikod, pemesai Parlimen Kanowit iya nya 2,187 kilometer persegi sereta penyampau rayat ke mendam dia iya nya 24, 700 iku seraya penyampau pengundi iya nya 30,988 iku.

Parlimen Kanowit bisi dua sitak Kunsil Nengeri (DUN) ti nyerangkung DUN Ngemah enggau DUN Machan.

Aaron mujur menang ba Parlimen P.210 Kanowit rambau PRU Ke-14, pengudah nerima penyampau 9,522 undi. – TVS


Join our social media channel to get our news Alerts and highlights.

Leave a Reply

Your email address will not be published.