Gerempung RNI terus chakah ngetanka adat Iban

Spread the love

MIRI, 8 Nov : Gerempung Raban Ngepan Iban (RNI) terus chakah ngetanka adat bansa Iban lebih agi ba menua Sarawak nengah chara ngatur Pekit Keling Kumang Tikas Nengeri Sarawak 2022.

Juluk ati komiti pengatur Pekit Keling Kumang RNI 2022 iya nya deka terus ngerembaika adat tauka main asal sekalika nya ba senentang ngepan Iban, adat enggau pengarap, tanda asal kelimpah mekuh ke jaku Iban nyadi identiti etnik majoriti di Sarawak.

Chairman Gerempung RNI, Steven Abas Patrick Agus madah, bisi 24 iku semua pemekit ti deka ngambi bagi ba pekit tu ila nyengkaum 11 iku deka ngerebut gelar Kumang lalu 13 iku deka ngerebut gelar Keling RNI 2022.

“Taja pia, bala pemekit deka dulu diuji nengah pengelandik mandangka adat asal Iban tauka Pekit Pengelandik Main Adat Asal Iban di deka diatur ba Bintang Megamal Miri kena 12 November tu.

“Sida ke ngambi bagi tu ila datai ari selampur Sarawak baka ari Julau, Marudi, Niah, Limbang, Selangau, Lubok Antu, Kanowit, Tatau, Bintulu, Sri Aman, Sibu, Kapit enggau Miri,” ku iya nengah sebengkah penerang nuju TVS sehari tu tadi.

Nangkan ke nya, Steven madah renggat kepenudi Pekit Keling Kumang RNI 2022 tu deka diatur kena 26 November ba Dinner World Restaurant di Bintulu.

Nya alai, iya madah diri berasai chukup temegah laban pekit serak tu mujur diatur betimpai mua baka sebedau tu.

Berebak enggau nya, iya madah raban pemekit tetap deka diuji pengelandik nengah arus rama ianya ngaga siti video pengelala diri lalu dipandangka ba Facebook Persatuan Raban Ngepan Iban.

Udah nya, penyampau ‘like’ enggau ‘share’ ti pemadu mayuh deka dipadu ngempu gelar Dara tauka Bujang Dikerindu.

Nya alai, sukung ari bala mayuh, raban pemekit, sereta pengiruh orang ke meri belanja deka seruran dikeingat lebih agi baka Gua Long House Miri ke udah melanja palan endur pemekit ngenduh kena 11 November tu ila nyadika  peransang ngagai Gerempung RNI ngatur program tu manah agi dudi hari, ku iya.

Berambaika jaku Glamourous Kumbu enggau Adat Nyerakupka Bansa ungkup malam final disadang deka digulu urung 1,500 iku temuai nyengkaum bala pemesai ke dipebasa. -TVS

Tags: #ib, adat

Join our social media channel to get our news Alerts and highlights.

Leave a Reply

Your email address will not be published.