KUCHING : Galang anak Jabai, 36 mujur nyaup nambahka midul emas ungkup tim Para Sukma Sarawak ngalih hari tu tadi.

Midul emas tu mujur dijapai peranak asal ari Nanga Aboi, Entabai, Julau tu nengah Lumba Nyemerai 100 meter final, kategori SB6 lelaki gaya Breaststroke enggau rikod baru 1: 56.93.

Midul pirak dipenggi atlit Sabah, Shahafiq Abdullah enggau rikod 2 :01.87 enggau midul engkeraju diempu atlit mega ari Sarawak iya nya Jack anak Lampung enggau rikod 3 : 35.36.

Kemari Galang mega mujur bulih midul pirak nengah lumba nyemerai beraban 4 X 100m begulai enggau bala bakih ke bukai iya nya Fraidden Dawan, Emban Tamoh enggau Riandto Rusmadi. Midul emas ba lumba tu mujur diempu raban atlit ari Sabah.

Ungkup penemu, tim Para Nyemerai Sarawak serak tu ngembuan juluk besai iya nya deka ngetanka gelar champion penuh ke-14.

Ba Pekit Para Sukma XX MSN, Kuala Lumpur 2022, Sarawak bisi nganjung 134 atlit bepekit dalam 10 bansa lumba enggau main. -TVS