Anang enggai nanam bemban, senggang, kerupuk enggau buluh – Empiang Jabu

Spread the love

KUCHING, 6 Okt: Komuniti rumah panjai dilalau anang ngemunaska utai tumbuh ke ulih dikena ngaga asil kraf jari baka tikai, chapan, raga enggau ke bukai.

Chairman Iban Women Charitable Trust (IWCT), Tan Sri Empiang Jabu madahka, kemaya hari tu bisi tusah mimit deka ngiga bemban, senggang, bundung, kerupuk, akas enggau purun laban mayuh udah punas sereta enda ditanam baru.

Tekan ba link tu > > > Iban Women Charitable Trust (IWCT) ngatur pekit pengelandik jari

Beduduk ari nya, iya meransang orang ke mendam di menua pesisir, lebih agi di rumah panjai tau mupuk nanam baru semua bansa utai tumbuh nya awakka bisi belama sereta ulih dipeda, diguna nyentuk jemah ila.

“Nya entara kebuah IWCT ngatur pekit pengelandik jari dikena nerenak pemereti ati senentang guna nyaga sereta ngemeranka utai tumbuh ba kampung ti tau dikena ngaga kraf jari.

“Diatu mayuh orang nganyam tikai ngena tali ladat ketegal nadai bemban. Nya mih kebuah aku meransang bala kitai ba rumah panjai anang enggai nanam bemban, buluh enggau semua utai tumbuh ke ulih dikena ngaga asil pengelandik jari,” ku iya madah ngagai raban pengarang berita apin lama ke udah.

Empiang mega meransang peranak di rumah panjai anang enggai nanam buluh laban nya mega ulih dijual sereta nambahka asil penatai pemisi.

“Kitai ulih nyual buluh ti digaga nyadi ruas, ulih dikena ngaga produk asil jari ke bukai ti tau nambahka asil penatai pemisi,” ku iya madah agi.

Entudi ke nya,  siku kaban komiti IWCT, Dr Anna Durin madahka, kelimpah ari bekebun, betupi enggau bedagang, ngaga enggau nyual asil kraf jari mega ulih dikemansangka ba menua pesisir.

“Nama kebuah kitai ngena bemban enggau buluh? Laban awakka asil pengelandik jari ke digaga kitai semampai bisi dipeda sereta deka dikena ngemansangka industri kotej.

Entudi ke nya, iya mega ngelalau raban nembiak rebak baru anang sanggu enggau lembau minta penemu ari sida ke tuai senentang chara beranyam enggau ngaga kraf jari ke bukai sekalika ngambi kelas tauka kus ke bekaul awakka pengelandik nya seruran ditampung rebak dudi.

Ba pengerembai ke sama, iya arapka budaya enggau main asal iban ke bukai ulih terus ditanka ngambi bisi dipeda sereta dimalin dudi hari. – TVS

 

 

 

 

 

 


Join our social media channel to get our news Alerts and highlights.

Leave a Reply

Your email address will not be published.