Penghulu Lubon Kinchang siku tuai ti ngembuan penyikar, pengepuh enggau pengeransing

Spread the love

BINTULU , 26 Ogos : Tetiap iku tuai peranak tauka tuai raban bansa sigi ngesan tangkup pengawa ke berat ti nyengkaum pengawa siku-siku orang ke nyadi penghulu.

Tuai pelilih (DO) Tatau, Jabang Juntan madahka penghulu bejalaika pengawa ti beguna ba dalam komuniti lebih agi lebuh ngaga pemutus tauka meri sanding penemu bekaul enggau mayuh macham pekara.

Iya mansutka penemu nya rambau program makai lemai ngenang pengawa penghulu kandang endur Sangan enggau Kakus ke lama iya nya Penghulu Lubon Kinchang.

Ku iya madah, ambika chunto Penghulu Lubon Kinchang udah mujur bejalaika pengawa iya lalu seruran ngemeratka penyabar, pengeransing ngambika tetiap iti kereja ke digaga bejalai lanchar sereta nerima timbal ke manah.

“Aku ngarika Opis Pelilih Tatau beterima kasih ngagai Penghulu Lubon ti udah mujur bejalaika servis ke pemadu manah ngagai komuniti”, ku iya madah.

Beduduk ari nya, iya nerangka Penghulu Lubon tetap deka dijadika malin ungkup Opis Pelilih Tatau enggau tuai peranak sereta tuai raban bansa ke bukai (KMKK) laban iya ngembuan mayuh peneleba.Nangkan ke nya chairman KMKK pelilih Tatau, Penghulu Sanok Magai madahka entara pemujur ke udah dijapai Penghulu Lubon iya nya nyadi entara orang ke numbuhka serakup tuai peranak enggau tuai raban bansa pelilih Tatau.

Iya madahka Penghulu Lubon siku tuai ke terit lebuh mutarka kes ti ngaul komuniti, ketebal agi kes kort bumiputera ti nyerangkung kes sarak, kes berebutka tanah, kes rumah panjai diserungkai sereta kes tauka isu ke bukai.

Sanok ngarapka ulah, komitmen sereta penyikar Penghulu Lubon lebuh bejalaika pengawa patut dijadika teladan ngagai tuai peranak bukai di pelilih nya.

Beserimbai enggau program nya, Penghulu Lubon beterima kasih ngagai Opis Pelilih Tatau, KMKK enggau komuniti ke udah meri kerejasama ke manah sekumbang iya megai pangku pengawa nya pengelama 14 taun. – TVS

Tags: #berita, #ib, #iban

Join our social media channel to get our news Alerts and highlights.

Leave a Reply

Your email address will not be published.