Penyampau pemeri rengka tubuh agi kurang di Sarawak

Spread the love

KUCHING, 25 Ogos: Tajapan meri rengka tubuh ulih nyelamat tauka ngidupka nyawa penerima tang penyampau orang ti meri rengka tubuh di Sarawak agi kurang.

Sapit Premier Sarawak, Dato Sri Dr Sim Kui Hian madah, Sarawak begunaka mayuh agi orang meri rengka tubuh laban penyampau 5,000 iku orang ke diatu bedau chukup nangkup peminta nya.

Ku Dr Sim madah, penyampau ke agi kurang tu ngujungka mayuh pesakit mati lebuh ke nganti deka nerima rengka tubuh.

Tuju pengawa mindahka rengka tubuh ari pemeri ngagai penerima ti begunaka rengka tubuh iya nya sebagi ari chara dikena nerenak pemereti ati mensia mayuh dalam nyelamatka mayuh agi pesakit.

“Nya alai, objektif ‘organ transplan’ tauka pemeri rengka tubuh iya nya ke tuju meri penyedar dikena nyelamatka mayuh agi nyawa enggau meri peluang ngagai sida ulih idup baru.

“Sekali agi, pengawa mindahka rengka tubuh ari pemeri ngagai penerima iya nya siti chara teknologi ti ulih nyelamatka nyawa, ngangkatka kualiti idup pesakit ti napi penanggul rusak rengka tubuh ba renggat kepenudi,” ku iya.

Iya mansutka jaku nya lebuh dirandau pengarang berita pengudah Minggu Penyedar Pemeri Rengka Tubuh Renggat Nengeri Di Sepital Besai Sarawak (HUS) ditu lebuh Hari Empat.

Ba pengerami nya mega, Dr Sim mega bisi bejadika Opis Unit Perolehan Organ HUS.

Minggu penyedar pemeri rengka tubuh renggat nengeri diatur ari 11 nyentuk 17 Ogos ninting taun ti berambaika jaku ‘Organ Derma:Cakna Demi Kehidupan.

Sama bisi datai iya nya, Direktor HUS Dr Ngian Hie Ung enggau pengari Direktor Opis Pengerai Nengeri Dr Azlee Ayub.- TVS

Tags: #ib, #iban, #tvstv, hus

Join our social media channel to get our news Alerts and highlights.

Leave a Reply

Your email address will not be published.