Pengawa nyeruri 7 buah sekula di DUN Tamin benung chakah dipejalaika

Spread the love

SELANGAU, 21 Ogos: Bisi tujuh sekula repuk di sitak Kunsil Nengeri (DUN) Tamin deka diangkatmanah nengah duit turu penyampau lebih kurang RM35 juta.

Ku Kaban Kunsil Nengeri (ADUN) Tamin, IR Christopher Gira Sambang madah, sekula repuk ke diangkatmanah tu nyengkaum sekula ba baruh Opis Pelajar Pelilih Selangau enggau Opis Pelajar Pelilih Sibu.

“Ba baruh Opis Pelilih Selangau, kitai ngangkatmanah SK Sungai Dijih, SK Batu 36, SK Penghulu Imban enggau SK Sepiring lalu ba baruh Opis Pelajar Pelilih Sibu iya nya SK Siong ili enggau SK Siong Tengah.

“Nyadi sekula SK Siong Ulu mega diangkatmanah tang nguna duit turu konsensi balak.

“Nangkan ke nya, projek ngangkatmanah sekula repuk tu mekuhka ngagai pengawa nyeruri bilik darjah iya nya nganti bilik darjah ke lama ti agi nguna kayu lalu diganti ngena konkrit, nyeruri kuarters pengajar enggau dewan makai,” ku iya madah lebuh ditelefon pengarang berita TVS lebuh Hari Lima.

ADUN Tamin, Christopher Gira Sambang

Ku iya madah , dewan makai di SK Sepiring udah tembu digaga sereta udah diserah ngagai Opis Menteri Pelajar Malaysia.

Pia mega, sekeda projek nyeruri ba endur bukai benung chakah dipejalaika lalu dijangka tembu ba awakka semak tu.

Iya beterima kasih ngagai Opis Pelajar Malaysia ke udah meri agih belanja dikena ngangkatmanah sekula repuk di menua pesisir tu.

“Aku ngarapka kunteriktor ke ngaga projek di sekula tu ulih bejalaika pengawa enggau manah sereta jampat nitihka timpuh ti diperambu tembu lalu naka ke diatu projek tu dipejalaika enggau lanchar sereta mujur.

“Berindik ari nya, aku mega ngarapka mayuh agi duit turu diungkupka dikena nyeruri sekula di menua pesisir awakka ulih merik pemaik ngagai nembiak sekula enggau pengajar,” ku iya madah agi.

Sebedau tu Sapit Menteri Pelajar, Inovasyen enggau Pemansang Pengelandik Dr Annuar ba Aum Kedua Ungkup Penggal Keterubah DUN Sarawak kena bulan lima nyin tadi madahka, ungkus dikena nyeruri SK Siong iya nya RM2.46 juta, SK Sepiring RM11.16 juta, SK Dijih RM9.5 juta, SK Batu 36 RM 5.96 juta enggau Sekula Penghulu Imban RM7.89 juta.- TVS


Join our social media channel to get our news Alerts and highlights.

Leave a Reply

Your email address will not be published.