Iban Women Charitable Trust (IWCT) ngatur pekit pengelandik jari

Spread the love

KUCHING, 22 Ogos: Iban Women Charitable Trust (IWCT) Sarawak deka ngatur Pekit Pengelandik Jari ungkup taun 2022-2023.

Ku Chairman IWCT Tan Sri Empiang Jabu madah, pekit tu deka diatur kena 15 hari bulan lapan 2022 nyentuk ke 15 hari bulan empat 2023 lalu pekit tu mekuhka ngagai pengawa nganyam tikai bemban, ngaga marik empang, kain tenun, baju burung enggau selapuk tunjang.

Ku iya madah, pekit ke baka tu siti ari inisiatif gerempung nya dalam nyungkak pemansang budaya enggau ekonomi tebal agi ungkup sida ti ngembuan pengelandik jari.

“Pekit tu ketiga kali udah diatur Iban Women Charitable Trust (IWCT) ke alai sebedau tu diatur ba renggat bagi menua di Sri Aman.

“Berindik ari peneleba ke kala ngatur pekit tu, nya alai serak tu kami deka ngatur enggau besai agi iya nya ngaul serata Sarawak, ku iya madah.

Empiang nerangka, pekit serak tu diatur nengah kerejasama enggau Universiti Malaysia Sarawak (UNIMAS) ti nyadi penyanding penemu senentang baka ni pekit tu ulih diatur.

Iya meransang orang lelaki tauka indu Iban ngambi bagi ba pekit baka tu sereta mantaika pengelandik sida nya ngasilka kraf jari tebal agi bekaul enggau kelai budaya Iban.

“Kitai indu kitai Iban endang ngembuan pengelandik enggau pemandai tebal agi landik ngasilka kraf jari ke alai pekara tu patut diteruska enggau diajar ngagai nembiak rebak baru.

“Nya kebuah, pekit tu diatur dikena mandangka pengelandik nya ngambika ulih dipeda semua pupu bansa seraya ngetanka kraf jari asal bansa iban taja pan kitai diatu nyau udah nguna chara pengidup ti moden agi.

“Aku arapka bala kitai indu, baka kitai ke diau di rumah panjai terus ngetanka pengawa baka betenun enggau beranyam ngena wi, buluh, senggang enggau bemban sereta anang enggai betanamka utai tumbuh tu.

Iya arapka budaya enggau main asal ulih terus ditanka ngambi bisi dipeda enggau dimalin nembiak rebak baru asil pengelandik jari bansa kitai iban nerima peminta ke tinggi tebal agi ari menua luar, lalu pekara tu ulih mantu orang indu  bisi pengelandik jari ngasilka kraf jari dikena nambahka asil penatai pemisi diri.

Berebak ari nya, Tukang Wang Iban Women Charitable Trust Datin Seri Angelina Ujang madahka pekit pengelandik jari serak tu dibagi ngagai tiga kategori iya nya pekit nganyam, pekit tenun enggau pekit nusuk manik.

Ku iya madah, pom dikena masuk pekit tu tau diambi ari raban komiti ke nyengkaum Pampang Opis Serakup Indu Serakup Indu Dayak Sarawak tauka google pom.

“Hari bulan nganjung pom pekit iya nya belabuh ari 15 Ogos 2022 nyentuk 15 Oktober 2022. Siku pemekit semina tau masuk siti pekit aja.

“Hari bulan ti kepenudi nganjung asil kraf jari ke udah digaga iya nya kena 15 April 2023 lalu dikirum ngagai IWCT,” ku iya madah agi.

Pekit tu diatur nitihka kategori baka ke dipandangka ba baruh tu:

Kategori A: PEKIT NGANYAM
a) Tikai bemban anyam bebuah
Tikai mesti dianyam gena bemban
Sukat pemesai enggau pemanjai – enda mit ari 4 kaki X 8 kaki
Chura – anang bechura (original)
Buah/ukir anyam bebuah
Perais
1st _ RM1800
2nd – RM1500
3rd – RM1200
4th -10th RM300 (siku)

b) Selapuk Tunjang
Anyam ari buluh
Enda kurang ari tiga ringkat
Chura – pemilih diri empu
Perais
1st – RM500
2nd – RM400
3rd – RM300
4th -10th RM150 (siku)

KATEGORI B : PEKIT TENUN
a) Kain Tenun Kena Orang Indu Besai Tuai : Kebat
Atur Tenun Kain – kebat
Sukat pemesai -2.5 kaki X 5 kaki
Benang – ‘Cotton with natural dye’

b) Baju Lelaki (besai tuai lalu siap tau dikena): Karap
Baju lelaki karap/baju burung karap
Benang – ‘Coloured polyester & metallic threads’
c) Baju Lelaki (besai tuai lalu siap tau dikena): Kebat
Baju Kebat Lelaki
Benang – ‘Cotton with natural dye’
PERAIS
1st – RM1800
2nd – RM1500
3rd – RM1200
4th-10th RM300 (siku)

KATEGORI C: PEKIT NUSUK MARIK
a) Marik Empang Tradisional / Tango (Saiz besai tuai)
Semua marik ti dikena ‘seed beads’
Marik nya ukai bansa ti bekilat
Tali – gena ubung Anchor
Chura – pemilih diri empu
Ukir – pemilih diri empu
Tisi marik mesti bisi buah pumpun (wool)
Perais
1st – RM1000
2nd – RM800
3rd – RM600
4th -10th RM200 (siku)


Join our social media channel to get our news Alerts and highlights.

Leave a Reply

Your email address will not be published.