“Penanyi lama enggau baru sama ngerichahka industri muzik Dayak” – Allesandro

Spread the love

Kuching , 19 Ogos : Minggu tu program Iban TVS , Pemerindang Borneo begulai enggau siku penanyi lelaki ke tebilang mai lagu petang, Allesandro.

Iya madahka, industri muzik Dayak kemaya hari tu dirichahka penanyi lama enggau baru ke sama bisi chara dikena ngangkatka nama awakka ditemu mensia mayuh ke ukai semina di Sarawak, tang rembus ke Sabah sereta Semenanjung.

“Aku enggai nyebut senentang orang ke lama. Orang tauka penanyi ke baru baka pemuzik, penanyi, baka band mai utai ke baru agi enggau enda ninggalka utai ke lama.”

“Kitai patut bisi visyen kediri empu. Industri muzik Dayak diatu udah bediri sama tinggi enggau industri muzik ari menua bukai nya alai kitai patut berani ati nguji utai ke baru ngambika kitai ngembuan standard kediri empu”, ku iya lebuh bejaku ba program Pemerindang Borneo.

Nangkan ke nya ku penanyi ti tebilang enggau lagu Timang Pengerindu, iya madahka penanyi rebak baru mesti nemu ngemansangka diri enggau berani nguji pekara baru ke tau ngemujurka karier sida ba dalam dunya pemerindang.

Tetiap pengawa ti dikereja siku-siku orang begunaka pengeransing, pengepuh enggau pengelandik seraya nerima sukung ari orang bukai, lebih agi diri sebilik sereta kaban belayan ke bukai, kelimpah ari bala peminat.

Nyadi, ngagai kita ke rindu ninga sada nyawa Allesandro anang enda ingat meda iya ba dalam program Pemerindang Borneo, malam hari minggu kena 21 hari bulan 8 tu, pukul 8.45 malam semina di TVS, channel 122 Astro enggau Myfreeview.

Pemerindang Borneo iya nya siti program pemerindang di tvs ke nguna jaku iban ti diayanka tetiap malam hari minggu. – TVS

 

 

 


Join our social media channel to get our news Alerts and highlights.

Leave a Reply

Your email address will not be published.