Mutarka isu dadah nguna ukui penyidi enggau perengka teknologi baru

Spread the love

GEDONG, 16 Julai: Perintah Sarawak terus chakah ngatur sekeda program enggau chara ti pemadu engkeman dikena mutarka isu salah nguna dadah di nengeri tu, lebih agi ngaul raban nembiak.

Ku Premier Sarawak Datuk Patinggi Tan Sri Abang Johari Tun Openg madah, perintah nengeri udah bejalaika mayuh macham program ti nyengkaum bekerejasama enggau ejensi nagang enggau mutarka isu dadah di renggat nengeri enggau Polis Diraja Malaysia (PDRM).

Iya madahka, entara program ti dipejalaika perintah iya nya nyadung penerang bekaul enggau penusah ke ulih nyadi enti sema siku-siku orang nya salah nguna dadah, lebih agi meri empas ke enda manah ari sukut pengerai tubuh enggau ruang bilik.

“Perintah Sarawak mantu ejensi ngemunaska dadah nengah chara meli ukui penyidi dadah.

“Aku nanya berapa rega siku ukui baka tu, rega siku ukui sigi mar. Laban ukui tu diberi latih nyium enggau nyidi barang ke bisi dadah. Kitai meli ukui baka tu sereta kitai minta saup Polis Diraja Malaysia (PDRM) meri latih ngagai ukui tu,” ku iya madah.

Abang Johari ke mega Kaban Kunsil Nengeri Gedong madahka, chara bukai ti dipejalaika perintah iya nya nguna perengka teknologi pemadu baru.

“Nyadi aku udah meri bantu lebuh kitai meri perengka teknologi ti diguna ba padang bilun. Perengka tu ulih meda barang ke bisi disimpan ba dalam kantung. Pia mega, ulih meda semua barang ke bekaul nengah perengka teknologi digital,” ku iya madah agi.

Iya madahka, sukung ari perintah Sarawak ba pengawa nagang sereta mutarka isu salah nguna deka terus ditambah enggau dikemanahka seraya dikerembaika nyentuk ke serata nengeri tu.

Taja pan pia, iya madahka, pekara tu mesti nerima sukung enggau kerejasama ari rayat ngambika juluk Sarawak deka nyadi nengeri ti ngerikodka kusung kes dadah ulih dijapai dudi hari.

Premier mansutka jaku nya beserimbai enggau Majlis Sambutan Peringatan Hari Dadah Kebangsaan (HADK) enggau Program Jualan Terus Dari Ladang Keluarga Malaysia Negeri Sarawak Tahun 2022 lebuh Hari Enam. – TVS

Gambar: UKAS

 

 

 

 

 

 

 

 

 

 

 

 

 

 

 

 

Tags: #ib

Join our social media channel to get our news Alerts and highlights.

Leave a Reply

Your email address will not be published.