Projek SARES deka terus dikerembaika di serata DUN Baleh

Spread the love

KAPIT, 7 Julai: Peranak di Rumah Jamit, Nanga Sepanggil, Baleh ngasaika bekal karan ke lebih manah pengudah projek Skim Bekal Karan Menua Pesisir Sarawak (SARES) ti disediaka perintah Sarawak udah dipenyadika pengari rayat di kandang menua nya.

Kaban Kunsil Nengeri (ADUN) Baleh, Nicholas Kudi Jantai madahka, Rumah Jamit ti bisi 27 pintu sama nerima ungkup RM55,000 nyentuk RM60,000 sepintu sereta penyampau semua ungkus ke diguna lebih kurang RM1.48 juta.

“Nyadi bekaul enggau pengawa aku ke udah bejadika projek SARES di Rumah Jamit, aku arapka peranak di rumah panjai nya ulih ngasaika bekal karan ke lebih manah,” ku iya madah.

Nicholas Kudi nerangka, projek SARES tu udah dikemansangka di kandang menua pesisir ke jauh ari sistem grid sereta nadai datai akses karan.

Naka ke diatu, SARES ti nguna sistem solar tauka dikumbai ‘Mikro Hidro’ dipeda ulih mantu nyendiaka bekal karan ke diguna peranak di rumah panjai ninting hari lebih agi sida ke mendam di ulu sungai.

“Diatu mayuh udah rumah panjai di DUN Baleh udah nerima projek SARES.

“Pemisi SARES tu mega mantu nambahka tikas pengidup rayat pengudah penanggul suntuk tauka nadai karan udah mujur diputarka,” ku iya madah agi.

Berebak ari nya, iya deka ngerembaika agi projek SARES di serata DUN Baleh awakka tetiap genturung pendiau enggau rumah panjai ulih ngasaika bekal karan 24 jam sebaka enggau sida di mengeri.

“Pekara tu mandangka perintah Gabungan Parti Sarawak (GPS) seruran betatika pengelantang rayat sekalika di menua ulu tauka di menua pesisir, lebih agi nyendiaka infrastakcha sereta perengkaguna ke lebih manah. ” ku iya madah agi.

Sebedau nya, Nicholas diberi basa bejadika program Ngiling Bidai ke diatur ba Rumah Jamit. – TVS

 

Tags: #ib

Join our social media channel to get our news Alerts and highlights.

Leave a Reply

Your email address will not be published.