Deligit Sarawak ti dituaika Dr Rundi nemuai ke YCH enggau Prime Aqua Sea Farm di Singapura

Spread the love

SINGAPURA, 7 Julai: Deligit ari Sarawak ti dituaika Menteri Betanam Betupi Moden enggau Pemansang Kandang Menua Dato Sri Dr Stephen Rundi Utom neruska pengawa nemua seraya gawa ke Singapura.

Ba hari ti kedua di Singapura sida bisi ngelawa seikat YCH iya nya sebuah kompeni ti mutarja rentayan bekal pemakai ke pemadu dikelala di menua republik nya.

Opis Menteri Betanam Betupi Moden enggau Pemansang Kandang Menua (MANRED) ba laman Facebook madahka, tuju penemuai deligit nya ke serikat YCH deka meretika sereta belajarka chara YCH ti nyadi palan logistik besai dunya seraya meri idea tauka langgur baru ba pengawa ngenegapka rentayan bekal pemakai di Bumi Kenyalang.

“Serikat nya mega nyadi kaban kunsi ba pengawa ngatur rentayan bekal serantau mayuh macham chap tebilang di serata Asia Pasifik,” ku iya madah.

Dr Rundi rambau nemuai ke Prime Aqua Sea Farm di Singapura.

Entudi ke nya, DR Rundi enggau deligit ari Sarawak bisi nemuai ngagai Prime Aqua Sea Farm.

Prime Aqua Sea Farm iya nya siti ari ladang nupi ikan pemadu besai di Singapura ti nguna endur pemesai 3.5 hektar, sereta disikap enggau inovasyen sereta perengka teknologi moden.

“Ladang nya nguna kuasa ari 416 iti panel solar sereta ulih ngasilka ais ari ai tasik dikena ngemudahka pengawa ngangkut ikan.

“Kelimpah ari nya, ladang nya mega bisi sistem ngubat ai tasik ti ulih nukar ai tasik nyadi ai irup nengah proses ‘reverse osmosis’,” ku MANRED madah agi.

Semua penerang ke bekaul enggau peneleba ke ditemu sida di menua nya deka diguna ba pengawa ngemansangka Sarawak lebih agi ari sukut betanam betupi moden, ngasilka pemakai ba tikas entarabansa.

Entara menteri bukai ke nyempulang pengawa nemuai Dr Rundi di Singapura iya nya Sapit Menteri Betanam Betupi Moden enggau Pemansang Kandang Menua (Betanam Betupi Moden), Datuk Dr Abdul Rahman Ismail, Sapit Menteri Betanam Betupi Moden enggau Pemansang Kandang Menua (Pemansang Kandang Menua), Martin Ben, Sapit Menteri Dagang Entarabansa, Industri enggau Meranak Puku, Datuk Malcolm Mussen Lamoh, Sekretari Mendam di MANRED Datu Edwin Abit sereta raban deligit ke bukai ari Sarawak. – TVS

Tags: #ib

Join our social media channel to get our news Alerts and highlights.

Leave a Reply

Your email address will not be published.