Komuniti ti rindu macha ulih nambahka penemu

Spread the love

KUCHING, 2 Jun: Budaya macha ngasuh runding siku-siku orang nya ngerembai seraya nambahka pengelandik maya bejaku mantaika penemu enti dibanding orang ti kurang macha.
Beduduk ari nya, Premier Sarawak, Datuk Patinggi Tan Sri Abang Johari Tun Openg endang meransang rayat Sarawak lebih agi nembiak anang lembau macha laban budaya nya ulih ngemansangka komuniti ti ulih nengkua mayuh macham leman bidang ba dalam pengidup.
“Laban baka ke ditemu kita pengerindu macha ulih ngemansangka penemu siku-siku orang.
“Enti sema nuan mayuh macha nuan deka nemu pengerembai pemadu baru enggau tetemuka chara ti pemadu engkeman dikena mutarka siti-siti penanggul ke ditapi,” ku iya rambau bejadika pengawa Nasih Tanah Begunan Tambah Ungkup Gurdwara Sahib, Kuching lebuh Hari Enam.
Abang johari nerangka, bisi siti bup iya nya ‘ Tomorrow’s Economy’ ti nerangka senentang pemansang pengidup dudi hari iya nya bekaul enggau kuasa enggau guna plastik.
Kelimpah ari nya, iya madahka, entara pekara bukai ke bisi ditusui ba dalam bup nya senentang ekonomi sekular ti nguna baru barang ke dibuai enggau pemanah pekara nya ngagai nembiak rebak baru.
Ba pengawa nya, iya muji komuniti Sikh ti nyendiaka mayuh kelas ba rumah sembiang dia ti nyadi endur orang macha.
“Diatu senang enti suba bisi librari ba muzium. Nyadi kitai mansa rumah sembiang tu enti sema deka ngelawa librari nya.
“Aku nemu laban aku mayuh bakih. Diatu semina nguna google kitai udah nemu penerang, nya mih ubah pemansang ba dalam pengidup,”ku iya.

Kelimpah ari nya, iya madahka, perintah Sarawak deka terus nyaga pengelantang tetiap pengarap di nengeri tu awakka sama ngasai bantu enggau pemansang ke dibai perintah.
Pemisi rumah sembiang ke ngaul mayuh macham pengarap di nengeri tu mandangka penyerakup rayat sekalika di mengeri tauka di menua pesisir.

Tags: #ib

Join our social media channel to get our news Alerts and highlights.

Leave a Reply

Your email address will not be published.