Bekunsika peluang pelajar di Sarawak nengah Ekspo Pelajar ngagai nembiak SPM, STPM

Spread the love

KUCHING, 26 Jun: Perintah Sarawak nengah Yayasan Sarawak ngatur program pemansang pelajar di semua pelilih di nengeri tu.

Tuju program ti diatur dikena nentuka nembiak sekula ke abis Sijil Pelajaran Malaysia (SPM) enggau Sijil Tinggi Pelajaran Malaysia (STPM) bulih penerang pemadu baru bekaul enggau peluang pelajar ke bisi disediaka di Sarawak.

Beduduk ari nya Prinsipal SMK Tatau, Dr Layang Ugek madahka, mayuh nembiak lebih agi di menua pesisir enda nemu tauka nadai nerima penerang senentang peluang pelajar ke ulih diambi sida.

Nengah program Ekspo Pelajar, sida ulih betanya sereta minta sanding penemu senentang kus enggau bidang ke pemadu engkeman diambi nitihka pemutus peresa.

“Nyadi aku arapka semua nembiak lebih agi nembiak pom lima enggau pom enam nguna manah peluang tu ngiga penerang pemadu baru senentang peluang pelajar awakka sida ulih ngaga pemutus enggau milih kus pelajar ke setipak enggau pemutus sida,” ku iya madah.

Iya madahka, bisi sepuluh universiti enggau kolej di menua tu deka ngatur program pemandang ba dampih kandang endur sekula SMK Tatau.

Nangkan ke nya, Pegawai Pelilih Tatau Jabang Juntan madahka, ekspo nya deka nyadi siti pelantar dikena nembiak betanyaka penerang senentang kus ke bisi disediaka sekeda universiti enggau kolej ti ngambi bagi ba dalam program nya.

“Kitai bisi ngangauka pengari ari universiti perintah di Sarawak baka Kolej Universiti i-CATS, Palan Penyulut Teknikal Sarawak (CENTEX), Universiti Swinburne, UCTS. Sida bisi datai ke sekula kitai,” ku iya madah agi.

Jabang nerangka, enti sema nembiak di Sarawak mayuh mujur ba dalam tetiap kus pelajar ke diambi dudi hari, juluk Sarawak deka nyadi kuasa ekonomi digital, ngembuan infrastrakcha enggau utiliti ke manah sereta rayat ngasaika asil penatai pemisi ke tinggi ulih dijapai.

Iya mansutka jaku nya beserimbai enggau program Ekspo Pelajar Tatau lebuh Hari Enam. – TVS

 

Tags: #ib

Join our social media channel to get our news Alerts and highlights.

Leave a Reply

Your email address will not be published.