Rayat di Bintulu deka terus ngasaika pemansang ti dibai perintah GPS

Spread the love

BINTULU, 15 Jun: Pemansang rayat di serata Sarawak entara pekara ti dikemeratka perintah nengeri sekalika di mengeri tauka menua pesisir.

Sapit Menteri Infrastrakcha enggau Pemansang Penyangkai Kapal, Dato Majang Renggi madahka, rayat ke mendam di bagi menua Bintulu mega deka terus ngasaika pemansang ti dibai perintah Sarawak ba baruh Gabungan Parti Sarawak (GPS).

Iya madahka, gelumbang pemansang ti kedua nya mungkur mayuh macham projek besai enggau sedang ke benung digaga sereta diperambu di Bintulu.

“Naka ke diatu, kitai udah ngasaika gelumbang pemansang ti kedua di Bintulu nengah pemisi sekeda projek ti besai enggau sedang ke benung dipejalaika enggau diperambu,” ku iya madah rambau Majlis Ramah Mesra Pemimpin Bersama Komuniti beserimbai enggau Gawai Dayak 2022 di Bintulu apin lama ke udah.

Majang madahka, entara projek nya nyerangkung Sarawak Petchem Methanol Project ti beungkus RM3.7 bilion ke diatu benung digaga sereta dijangka tembu ba taun 2024.

Entudi ke nya, Sarawak Medical Hub ti nguna puku RM1 bilion ,Sarawak Hydrogen Plant Bintulu ti dijangka berengkah digaga ba taun 2023.

Majang ke mega Kaban Kunsil Nengeri Samalaju meransang raban nembiak rebak baru ngambi peluang gawa ba dalam industri ke bisi ditumbuhka di pelilih nya.

“Penatai pemeranak puku ke menua tu enggau sekeda program ti dipejalaika perintah di Bintulu deka nyendiaka peluang gawa ngagai peranak ke mendam ba ditu.

“Beduduk ari nya, semua rayat di Bintulu, lebih agi raban nembiak sama ngerebut peluang ke udah disediaka tu,” ku iya madah agi.

Iya mega madahka, bisi sekeda kompeni ke udah bisi di menua tu merambu deka ngemesaika tauka nambahka kapasiti kilang.

Tags: #iban

Join our social media channel to get our news Alerts and highlights.

Leave a Reply

Your email address will not be published.