Industri eko dagang temuai ulih nyungkak ekonomi rayat di menua pesisir

Spread the love

BETONG, 10 Jun: Rayat ke mendam di menua pesisir lebih agi di rumah panjai diperansangka nelebaka diri ba industri dagang temuai ke ulih meri penguntung ke besai dudi hari.

Sapit Premier Sarawak Datuk Amar Douglas Uggah Embas madahka, nengah peluang tu rayat di menua pesisir ulih nyungkak ekonomi seraya bedajaka produk eko dagang temuai ke bisi di menua sida.

Sapit Premier Sarawak, Datuk Amar Douglas Uggah Embas

“Di Sarawak mayuh kandang endur ke ulih dikemansangka nyadi palan dagang temuai ti nyerangkung rumah panjai lama tauka tradisional, seni enggau main asal Iban ke endang dikerinduka bala temuai.

“Kelimpah ari nya, entara aktiviti ke ulih diatur di menua pesisir iya nya merau di sungai enggau neresa kampung ti ngembuan mayuh macham jelu sereta utai tumbuh ke tau narit ati temuai datai,” ku Uggah madah.

Ku Uggah ke mega  Kaban Kunsil Nengeri Bukit Saban madah, ambika chunto bemacham program dikena nyaga pemanah sungai enggau ikan tauka dikelala enggau nama Sistem Tagang ulih dikemansangka sereta rumah panjai enggau sekeda genturung pendiau baka Kampung Melayu di Spaoh ulih dijadika Home Stay.

“Padang bilun ke benung digaga di Bebuling, Spaoh mega deka nyendiaka servis pengangkut sereta pasinjir.

“Pemisi padang bilun enggau Jalai Besai Pan Borneo deka ngemudahka temuai datai ngagai siti-siti endur tebal agi di Betong enggau endur ke semak dia,” ku Uggah madah agi.

Berindik ari nya, Uggah mega arapka Sarawak Tourism Board (STB) ulih nyaup sereta mantu ngelala ti nyengkaum merambu senentang chara ti pemadu manah dikena ngemansangka sereta bedajaka sektor nya di menua pesisir.

 

 

Tags: #iban

Join our social media channel to get our news Alerts and highlights.

Leave a Reply

Your email address will not be published.