Nyikap diri napi pemar guna teknologi enggau telekomunikasyen kemaya hari

Spread the love

BINTULU, 24 April: Entara pemar ti ditapi rayat enggau perintah Sarawak dalam timpuh tiga taun ti deka datai tu iya nya ngemeratka guna teknologi enggau telekomunikasyen.

Sapit Premier Sarawak, Datuk Amar Douglas Uggah Embas madahka kedua-dua pekara nya deka dikemansangka seririh enggau ubah pemansang dunya kemaya hari ti bepelasarka pemansang guna teknologi sereta penemu internet.

“Kitai ulih berandau, betanya enggau pangan diri nengah internet. Enda ngira ba dini endur kita diau sereta ba sebarang maya.

“Kitai di Sarawak tu endang chukup betuah laban sepengudah Premier Sarawak Datuk Patinggi Abang Johari Tun Openg megai pangku pengawa nyadi tuai perintah iya terus ngemeratka polisi digitalisasyen,” ku iya madah rambau bejadika Aum Besai Tiga Taun Sekali PBB Kakus lebuh Hari Enam.

Uggah ke mega Sapit Presiden PBB madahka, sekumbang menua ke dituntung pandemik COVID-19 penemu nguna teknologi enggau internet suah diguna ninting hari.

“Kitai meli enggau mesan pemakai ngena servis P-Hailing lebuh kitai bejalaika kuarantin di rumah.

“Enti sema kitai nadai penemu ngena teknologi sigi tusah deka bebelika barang, lebih agi maya kitai ke benung dituntung penusah,” ku iya madah.

Beduduk ari nya, Uggah ke mega Menteri Infrastrakcha enggau Pemansang Penyangkai Kapal meransang raban tuai peranak, tuai raban bansa sereta tuai parti di Sarawak beratika senentang tikas bungkur internet tauka telekomunikasyen ba kandang endur sida.

“Kemaya hari tu kitai meda orang diatu bedagang nengah chara dalam tali arus baka nyual belacan, kuih, asil pengelandik jari baka bakul, raga enggau ke bukai.

“Nyadi nya entara program tauka inisiatif ti deka dikemansangka perintah nengeri lebih agi ngemanahka tikas internet enggau telekomunikasyen di serata Sarawak,” ku iya madah agi. – TVS

GAMBAR: UKAS

Uggah begambar enggau raban parti PBB Kakus rambau bejadika Aum Besai Tiga Taun Sekali PBB Kakus lebuh Hari Enam.

Join our social media channel to get our news Alerts and highlights.

Leave a Reply

Your email address will not be published.