Sarawak mekuhka chara dagang baru nengah digital

Spread the love

KUCHING, 20 Feb: Pandemik Covid-19 meri empas ti besai ngujungka perintah Sarawak mekuhka chara dagang baru nengah digital.

Kepala Menteri, datuk Patinggi Tan Sri Abang Johari Tun Openg andal pedagang nengeri tu deka mansang nengah ngemeranka dagang chara baru seriris enggau pemansang dunya digital.

Ku iya madah, ngemeranka digital setipak bendar enggau juluk perintah ti deka transformasyenka digital dalam mantu orang dagang chara bejalaika aktiviti dagang.

“ Kitai mega mekuhka era baru ari sukut pengawa dagang nengah digital. Ari pandemik kitai nemu reti digital, dagang nengah e-commerce, bayar nguna Sarawakpay, tu semua pekara baru.

“Taja betapi enggau pandemik tang pengawa dagang mit agi ulih bejalai nengah chara online,”ku iya.

Iya mansutka jaku nya maya bejadika Aum besai Ninting Taun Dewan Orang Dagang Sarawak (DUBS) Miri Ke-14 ungkup penggal 2021-2024 kena Hari Minggu.

Perintah Sarawak mega udah numbuhka Perkampungan Digital Tabung Ekonomi Gagasan Anak Sarawak (TEGAS) dikena mantu pedagang baru nyengkaum raban nembiak bedagang nguna chara baru.

Ku Abang Johari madahka, dikena ngerembaika ekonomi menua Strategi Pembangunan 2030 Pasca Covid-19 (PCDS 2030) udah dilancharka ti mungkur enam sektor.

“ Nya alai, postcovid-19 kitai bisi sekeda bidang ti ulih ngangkatka pedagang kitai ari sukut Dagang Temuai, Servis Rama, Ngaga Barang, enggau Betanam Komersial.

“Tu mih tuju kuing ba taun 2030,” ku iya nerang.

Perintah deka terus mantu orang dagang ti nemu ngidupka diri, ngembuan inisiatif kediri empu deka ngangkatka diri seriran enggau pemansang ekonomi.

Tags: #ib

Join our social media channel to get our news Alerts and highlights.

Leave a Reply

Your email address will not be published.