Kepala Menteri digela ‘Premier’ diatu

Spread the love

KUCHING , 15 Feb : Aum Kunsil Negeri (DUN) Sarawak ngemendarka Rang Undang-Undang (RUU) Konstitusyen Nengeri Sarawak (Ubah) 2022 dikena ngubah Konstitusyen Nengeri nukar gela pangku pengawa Kepala Menteri ngagai ‘Premier’ enggau majoriti dua pertiga.


RUU tu dibantaika Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah ke mega ngaul pengawa ngubah ‘Menteri Muda’ ba Konstitusyen Sarawak ngagai ‘Sapit Menteri’.


Ku Speaker DUN Tan Sri Datuk Amar Mohd Asfia Awang Nassar, RUU nya bulih sukung 67 seraya enam iku ke bukai nyakal.


Sebedau dikemendar, RUU tu udah dipejuraika 16 iku Kaban Kunsil Negeri (ADUN).


Sebedau tu, Abdul Karim mantaika perambu deka ngubah senentang nama pangku pengawa Kepala Menteri ngagai ‘Premier’ dikena ngelaika status Sarawak ti bebida enggau negeri bukai dalam Malaysia.


“Pengawa ngaga ubah ba konstitusyen perintah besai empai lama udah mulaika baru pekara ti udah ditetapka dalam Sempekat Malaysia 1963, iya nya Sarawak setuju deka nyadi sebagi ari penumbuh Malaysia, status Sarawak ditetapka nyadi siti ari tiga wilayah (Persekutuan Tanah Melayu, Sabah enggau Sarawak) ti numbuhka Persekutuan Malaysia.


“Tu ngayanka Sarawak sebagi ari tiga wilayah lalu dipadah enda ngembuan status ke sama enggau negeri ke bukai dalam Persekutuan Tanah Melayu,” ku iya.

Join our social media channel to get our news Alerts and highlights.

Leave a Reply

Your email address will not be published.