PDRM Tatau besemaya deka terus chakah meri servis ngagai rayat

By Steward Dawi
Spread the love

BINTULU, 14 Oktober: Polis Diraja Malaysia (PDRM) pelilih Tatau besemaya deka terus bejalaika pengawa lebih sikar sereta chakah agi ungkup pengelikun enggau pengelantang rayat di pelilih nya.

Ku Tuai Polis Pelilih Tatau DSP Jame Reis madah, PDRM sebuah ejensi penerit atur ke diberi tanggungpengawa meresa enggau matau Standard Atur Pengawa (SOP) Pelin Mulaika Pemanah Menua renggat tiga nengeri Sarawak.

Tuai Polis Pelilih Tatau DSP Jame Reis

“Diatu mayuh sektor ekonomi udah dibuka enggau menua udah deka ngalih ngagai renggat endemik.

“Tu bereti pengidup ninting hari kitai diteruska baka selama seraya ngemeranka sekeda chara tauka norma baru,” ku iya madah lebuh bejaku beserimbai enggau Pengawa Begempuru Tetiap Bulan Tuai Polis Pelilih Tatau maya Hari Empat.

Jame madahka, pekara nya seriran enggau juluk Tuai Polis Menua enggau Pengatur Pemadu Tinggi Polis ti mekuhka pengawa meri servis pemadu manah ngagai komuniti lebih agi raban gawa di luan.

“Ambika chunto, lebuh bejalaika servis ba kaunter tanya, MPV, URB enggau trafik.

“Raban tu ke suah agi betemu enggau rayat tetiap hari,” ku iya madah.

Kelimpah ari nya, iya madahka, polis ulih nyadika peranak ba luar nyadi kaban strategik  dikena mantu mutarka sekeda isu ke ditapi.

Iya mega mantaika pengaga ati ngagai penyulut ti dijapai pegawai, raban enggau pekereja perintah ke udah nerima anugerah  APC ba taun 2020 sereta ke baru niki pangkat apin lama ke udah.

“Aku arapka semua komuniti IPD Tatau deka terus komited enggau ransing agi enggau aku bejalaika pengawa ke udah diberi perintah enggau rayat ngagai kitai,” ku iya nambah.

Join our Telegram channel to get our news Alerts and highlights

Leave a Reply

Your email address will not be published. Required fields are marked *

Log In

Forgot password?

Forgot password?

Enter your account data and we will send you a link to reset your password.

Your password reset link appears to be invalid or expired.

Log in

Privacy Policy

Add to Collection

No Collections

Here you'll find all collections you've created before.