Mensia Mayuh ulih bekunsika penemu sida enggau MoF senentang Agih Belanja 2022

Spread the love

KUALA LUMPUR: Sebagi ari chara dikena ngangkatmanah proses nyendiaka agih belanja tetiap taun, Opis Menteri Pekara Wang (MoF) besetuju deka ngaga Keretas Konsultasi Awam (KKA) lalu mai mensia mayuh bekunsika penemu sida bekaul agih belanja tauka agih belanja 2022.

Ngambi ripot ari Bernama, pekara nya dipadahka Menteri Pekara Wang Tengku Datuk Seri Zafrul Abdul Aziz.

Ku Zafrul madah, KKA deka nyadi siti ari chara dikena ngenyukupka Penarang Pra-Bajet 2022 baka ke dipadahka bedau lama ke udah.

“Singkang ti keterubah, empat keretas konsultasyen mensia mayuh deka digaga dikena ngulihka input senentang bajet 2022.

Empat ari KKA tu iya nya Ngangkatmanah Polisi Perolehan Perintah bekaul enggau Barang/Servis Di Menua Tu enggau Bumiputera, Ngangkatmanah Program Bantu Tunai, Pansik Insentif Chukai enggau numbuhka Akta Tanggungpengawa Fiskal (FRA).

Keretas ti keterubah ngemeratka langgur ngangkatmanah polisi nguna barang tauka servis di menua tu enggau polisi serikat Bumiputera.

“Tu dikena nyaga serta ngemansangka industri di menua tu sereta ngurangka menua tu ari bepanggai ba barang import,” Ku Zafrul madah ba dalam siti aum media sehari tu tadi.

Tengku Zafrul madahka, pengawa ngangkatmanah Program Bantu Tunai tu dikena beratika penanggul, utai ke diguna serta chara ti engekeman lebuh meri bantu ngagai rayat lebih agi lebuh menua napi penanggul ketegal pengekai igi penyakit COVID-19.

Nangkanka nya, lebuh nerangka senentang Pansik Insentif Chukai, Zafrul madahka tu nyerangkung mansik baru insentif chukai pemeranak puku enggau lebih dalam agi dikena nentuka insentif chukai tu seruran ngemudahka pemeranak puku di menua tu nitihka gaya menua diatu.

“Tuju tu dikena ngemansangka agi menua tu awakka ulih besemekih enggau menua bukai lalu ulih narit mayuh agi pemeranak puku tama ngagai menua tu lalu ulih nyungkak ekonomi menua, nyendiaka peluang pengawa enggau ngangkatmanah penuduk fiscal menua,” ku iya nambah agi.

Kelimpah ari nya, iya madahka numbuhka FRA mega sebagi ari chara dikena nambahka pemanah pengatur menua, pengelurus ati sereta akauntabiliti lebuh ngatur fiskal menua ti nyerangkung ngatur asil, belanja, utang, risiko fiskal, sereta ripot pra-agih belanja enggau pasca-agih belanja, penuduk ekonomi enggau Langkar Kerja Fiskal Jangka Sedang

“MoF pechaya KKA ti keterubah digaga tu ulih nyendiaka mayuh agi peluang ngagai semua orang ngambika ulih bekunsika penemu diri empu ngambika agik belanja ulih digaga nitihka diguna rayat seririh enggau polisi sereta objektif menua,” ku iya madah.

Tanya tauka enti sema begunaka penerang ke silik tau dianjung ngagai [email protected] Lalu KKA tau dibantai turun ba laman web www.mof.gov.my. Paling laun pukul 5.00 lemai kena ke 15 hari bulan semilan 2021.

Titihka TVS ba TelegramFacebook, TwitterInstagramTikTok enggau YouTube.

Tags: #ib

Join our social media channel to get our news Alerts and highlights.

Leave a Reply

Your email address will not be published.