Projek Pantai Belawai Fasa II napi pengelaun ketegal pandemik

Spread the love

SARIKEI: Projek Ngemanahka Pantai Belawai Fasa II napi pengelaun mimit ketegal pandemik COVID-19 ti nuntung menua.

Menteri Muda Pemansang Mengeri, Pengatur Tanah enggau Rampa Menua, Datu Len Talif Salleh, madahka projek perintah Gabungan Parti Sarawak (GPS) nya ti beungkus RM2.1 juta udah berengkah digaga kenyau bulan Oktober 2020.

“Projek Ngemanahka Pantai Belawai sebedau tu ditaga tembu kena bulan Jun taun nyin suba tang napi pengelaun ketegal pandemik COVID-19,” ku iya.

Len Talif mansutka jaku nya ba laman Facebook iya pengudah ngatur aum sehari tu senentang status pemansang projek ngemanahka agi Pantai Belawai.

Iya ke mega Kaban Kunsil Nengeri (ADUN) Kuala Rajang madah Pantai Belawai nya siti palan ti ulih nyadi pematak temuai enggau pemanah rampa pantai ba sitak nya.

Ku iya, mayuh agi temuai dikearapka datai ngagai kandang endur tu kena ngelantangka ati sereta ngasaika kediri empu pemakai ti bisi ba Kampung Belawai enti jalai alun ngagai Sarikei tembu digaga lalu COVID-19 nadai ngelekai agi.

“Tu deka ngangkatka sosioekonomi peranak ba sitak nya ila,” ku Len Talif.

Sama bisi datai ngelawa projek nya sebedau tu ia nya Pegawai Opis Pelilih Tanjung Manis, Ismail Kasah, Sekretari Opis Pelilih Matu Daro, Ahmad Jerry Haji Hashim, Michael ke nyadi pengari Penyanding Penemu, Kaunselor Ibni Ekni, enggau Tuai Nembiak PBB Pampang 41 Kuala Rajang, , Tarzullah Khan.

Tags: #ib

Join our social media channel to get our news Alerts and highlights.

Leave a Reply

Your email address will not be published.