Perintah netapka rega kit meresa antigen COVID-19 RM19.90 seiti

Spread the love

KUALA LUMPUR: Perintah netapka rega runchit kit peresa antigen COVID-19 (meresa diri empu) ia nya RM19.90 siti set enggau rega burung ditetapka RM16 siti set berengkah ari 5 September tu.

Menteri Dalam Menua enggau Pekara Bebelika Barang (KPDNHEP) Datuk Seri Alexander Nanta Linggi madah rega nya bepelasarka rega ba semua premis enggau farmasi di serata menua.

“Penetap rega maksimum burung enggau runchit kit peresa antigen COVID-19 digaga nitihka patut enggau engkeman ba rega makit ngambika enda ngenusah pemeli enggau pedagang,” ku iya dalam siti penerang sehari tu.

Kelimpah ari nya, rega kit peresa antigen nya ditentuka ejensi perintah baka Opis Bekuasa Peranti Perubat (MDA), Opis Menteri Pengerai (KKM), Opis Kastam Diraja Malaysia (JKDM) sereta aum begulai enggau pengilang, pengimport, perunchit sereta gerempung farmasi.

Dalam penerang begulai enggau Menteri Pengerai Khairy Jamaludin, iya madahka pemutus netapka rega nya berindik ari peminta ba kit peresa antigen ti dipelaba majak nambah laban mensia mayuh nemu pasal guna meresa pengerai diri empu kena nentuka nadai orang kena rampit COVID-19.

“KPDNHEP mega melabaka empas bedagangka nya enggau nentuka rega ia sebaka ba semua renggat baka ti udah nyadi ba rega sengkabung mua maya diatu,” ku iya.

Berebak enggau nya, pedagang ke ditemu ngelanggar atur tu deka diukum ba baruh Akta Nyaga Rega enggau Antipencatutan 2011 sereta Akta Nyaga Bekal 1961.

Kit Antigen COVID-19 tu udah dikemendar enggau tetap ulih MDA enggau KKM kena meresa COVID-19 ti ngena sampel ai mulut tauka ‘swab’ ari idung.

Tags: #ib

Join our social media channel to get our news Alerts and highlights.

Leave a Reply

Your email address will not be published.