Nadai Kes Positif Varian Delta Dirikodka Di Sibu

Spread the love

SIBU, 18 Julai – Opis penguasa enda ngelalaika penerang ngagai mensia mayuh enti sema amat bisi kes varian delta ti ngaul peranak menua luar diripotka di Sibu.

Koordinator Komiti Mutarka Penusah Ngenyit Bagi Menua (JPBB) Sibu, Dr Annuar Rapaee nyemetak madahka, enti sema bisi kes nya diripotka,  JPBB Sibu tetap madahka pekara nya ngagai peranak di pelilih nya.

“Aku deka madah nadai penerang dilalaika senentang varian delta. Enti sema bisi kes positif JPBB deka madahka pekara nya. Sekalika bisi tauka nadai. Kitai sama nganti nadai penerang enda dipadahka kami. Berita ke ngerekai ba laman rama semina sangka orang aja.” ku iya madah nengah laman Facebook iya empu maya hari enam.

Dr annuar madahka, sangka nya nyadi lebuh bisi peranak menua luar ke ditetapka positif COVID-19 lalu sampel nya dianjung ke makmal Universiti Malaysia Sarawak (UNIMAS) maya 12 hari  bulan 7 ke udah.

Beduduk ari nya, iya madahka naka ke diatu nadai kes positif varian delta bisi diripotka di Sibu.

“Aku udah betelefon ngagai Direktor Institut Pengerai enggau Perubat Komuniti (IHCM) UNIMAS Profesor Dr. David Perera lalu iya madahka pemutus nya bedau dikeluarka. Aku madah agi pemutus bedau dikelauraka agi. Pemutus nya semina ulih ditemu sekalika seminggau tauka dua minggu sepengudah 12 hari bulan 7.” ku iya nerangka pekara nya.

Iya madahka, seagi bedau bisi pemutus ari makmal naka ke diatu nadai kes positif varian delta di Sibu.

Pekara nya deka dipadahka Komiti Mutarka Penusah Ngenyit Nengeri Sarawak udah tu ila.

Tags: #iban

Join our social media channel to get our news Alerts and highlights.

Leave a Reply

Your email address will not be published.